Liviyada vətəndaş müharibəsi təhlükəsi var"-RƏY

"BMT Təhlükəsizlik Şurasının Liviya ilə bağlı qətnaməsi xarici hərbi müdaxiləyə son qoymağı nəzərdə tutur".

BMT Təhlükəsizlik Şurası Liviyadakı münaqişə ilə bağlı qətnamə qəbul edib. Bildirilir ki, sənəd Liviyada atəşkəs rejiminin bərqərar olunması, bütün ölkələr tərəfindən Liviyaya dair silah embarqosuna riayət edilməsini və Liviya ərazisindən muzdlu hərbi hissələrin çıxarılmasını nəzərdə tutur. Qətnamədə həmçinin kənar dövlətlərə Liviya münaqişəsinə müdaxilə etməmək barədə çağırış da yer tapıb. Qətnamə Liviyada baş verən vətəndaş müharibəsində müxtəlif tərəflərin xeyrinə çıxış edən və bu ölkənin ərazisində öz hərbi qüvvələrini yerləşdirən Rusiya (Liviya ərazisində bu ölkəyə məxsus xüsusi hərbi şirkətlər fəaliyyət göstərir) və Türkiyənin Şimali Afrika ölkəsinə hərbi müdaxilə etmələrinə son qoymaq məsələsini ortaya qoyur.Təsadüfi deyildir ki, məhz Rusiya qətnamə ilə bağlı səsvermədə Təhlükəsizlik Şurasının 15 üzvündən bitərəf qalan yeganə dövlət oldu. Qalan 14 dövlət isə qətnaməni dəstəkləyib. Rusiya öz mövqeyini onunla əsaslandırır ki, Liviyada münaqişədə olan tərəflər yalnız indi dialoqa başlamışlar və atəşkəs rejiminin parametrləri yalnız bu dialoqun çərçivəsində müəyyənləşdirilə bilər.

İstənilən halda qətnamənin qəbulu Liviya ətrafında gedən geosiyasi prosesləri və maraqlı xarici mərkəzlərin mövqeyini və maraqlarını əks etdirir. Qətnamə Liviyada tezliklə sülhün bərqərar edilməsinə real müsbət təsir göstərəcəyi sual doğuran məqamlardandır.

Mövzu ilə əlaqədar politoloq Qabil Hüseynli Sonxeber.az-a danışıb. O, BMT nin sözü gedən məsələyə yarımçıq yanaşdığını bildirib:

"Düşünürəm ki, BMT bu məsələyə yarımçıq yanaşıb. Çünki Liviya silahlı qüvvələrinin komandiri qanuni hökumətə tabe olmur. Ona qarşı qiyam qaldırıb və onu devirməyə çalışır. Ölkədə vətəndaş müharibəsi təhlükəsi var.

Politoloq BMTnin xarici müdaxilələri dayandırmaq məqsədilə qətnaməni qəbul etdiyini vurğulayıb:

"Bu qaydalar beynəlxalq hüquq normalarına uyğundur. Türkiyənin Liviyadakı qüvvələri qanuni höküməti qorumaqla məşğuldur. Rusiyanın qüvvələri isə Xəlifə Xəftərin tərəfindədir. BMT bu iki dövləti oradan geri çəkilməyə çağırırsa, Xəftər əlində olan qüvvələrdən istifadə edəcək. Rusiya hərbi qüvvələrini isə Liviyadan çıxartmaq çətin olacaq. Bu hal qanuni hökuməti devirəcək və ölkədə diktatura rejimi yaradacaq".

Şəlalə Babayeva

Telegramda izləyin

instagramda izləyin