"ABŞ-da gözəl bilirlər ki, Azərbaycan regionun açar dövlətlərindən biridir"-RƏY
"Gallup" şirkətinin araşdırmasına görə, ABŞ prezidenti Donald Trampa dəstək 49 faizə yüksəlib. Bu, Trampın prezident kimi fəaliyyətə başladığı 2017-ci ildən bu yana ilk müsbət nəticədir.
Bu da noyabrda keçiriləcək seçkilərdə Trampın yenidən prezident seçilə biləcəyini göstərir. Ancaq eyni zamanda hələ də Trampa qarşı olanlar çoxluqdur. Onlar 48 faiz təşkil edirlər. Maraqlıdır ki, amerikalıların 65 faizi Trampın yenidən seçiləcəyinə inanır.
Bu vəziyytə dünya və Azərbaycan üçün nə vəd edir? Donald Trampın artıq 4 ilə yaxınlaşan prezidentlik dövründə ABŞ-Azərbaycan münasibətlərini analiz etmək və növbəti dəfə seçilərsə, Bakı-Vaşiqnton əlaqələri necə olacaq?
Mövzu ilə bağlı Sonxeber.az-a politoloq Elxan Şahinoğlu açıqlama verib. O, bildirib ki, həqiqətən də Trampın reytinqi artıb. Xarici siyasətdəki qərarları ziddiyyətli qəbul olunsa və dünyada xeyli suallar yaratsa da, daxili siyasətdə Trampın uğurları çoxdur:
"Yəni, inflyasiya və işsizlik azalır, iqtisadi uğurlar getdikcə çoxalır. Bunlar Trampın uğurlarıdır, ona görə də reytinqi getdikcə artır. Eyni zamanda demokratların ona qarşı impiçment tətbiq etmək istəyi də Trampın reytinqini daha da qaldırdı. İnsanlar düşündülər ki, demokratlar Trampa qarşı ədalətsizlik edir".
Politoloq Trampın ikinci dəfə seçilməsindən sonra Amerika Azərbaycan münasibətlərindən danışıb:
"Ümumiyyətlə, Amerikada prezidentin kimliyindən asılı olmayaraq ABŞ-Azərbaycan tərəfdaşlığı davam etdirilir. Bu müstəqillik illərindən bu günə qədər davam edən prosesdir. Tramp prezident olduğu illərdə Azərbaycan prezidenti ona bir neçə məktub göndərmişdi və Azərbaycanın strateji tərəfdaşlığı davam etdirməkdə maraqlı olduğunu söyləmişdi. Demokratların erməni lobbisi ilə əlaqələri daha sıx olmasına baxmayaraq, ABŞ-da dövlət başçısı demokratlardan olanda belə, onlar da Azərbaycanla əməkdaşlığa önəm verirdilər".
Politoloq bildirib ki, Azərbaycan bölgənin açar dövlətlərindən biridir: Azərbaycan ilə əməkdaşlıq digər bölgə ölkələri ilə əməkdaşlığa imkan yaradır. Ona görə də Amerika Azərbaycan ilə əməkdaşlıqdan qopmaq istəmir. Əlbəttə, Amerikada müxtəlif qüvvələr var ki, erməni lobbisi ilə bağlıdılar və bizim iradlarımıza baxmayaraq, zaman-zaman separatçılar ilə əlaqə saxlayır, hansısa konqresmenlər qanunsuz olaraq Qarabağa gəlir və yaxud Dağlıq Qrabağ separatçılarına maliyə ayırılar. Bəli, etiraf edək ki, Konqresdə erməni lobbisi güclüdür. Amma yenidən vurğulamaq istəyirəm ki, prezidentin kimliyindən asılı olmayaraq, Amerika Azərbaycan ilə strateji tərəfdaşlığa sadiqdir.
Fəridə Ağazadə
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş