"Xocalı soyqırımın törədilməsində ermənilərlə yanaşı o dövrdə hakimiyyətdə olan şəxslər də məsuliyyət daşıyırlar"- Cavanşir Paşazadə
Bu gün Xocalı soyqırımından 28 ili tamam olur.
Bununla bağlı Sonxeber.az-a danışan Milli Məclisin İctimai birliklər və Dini Qurumlar Komitəsinin üzvü, deputat, hakim Yeni Azərbaycan Partiyasında təmsil olunan Cavanşir Paşazadə bildirib ki, Xocalı soyqırımı təkcə azərbaycanlılara deyil bütün türk dünyasına qarşı törədilib:
"Hər kəsə bəllidir ki, ermənilər tarix boyu bizim ərazilərimizdə özlərinin böyük Ermənistan dövlətini yaratmaq istəyiblər. 1992-ci ilin fevralın 25-dən 26-sına keçən gecə erməni vandalları 366-cı motoatıcı alayın köməyi ilə Xocalıda azərbaycanılara qarşı soyqırım törətdilər. Bir gecədə 613 soydaşımız vəhşicəsinə qətlə yetirildi. 8 ailə tamamilə məhv edildi. Vəhşicəsinə qətlə yetirilənlər arasında körpələr, qadınlar, qocalar var idi. Ermənilər qətlə yetirdikləri azərbaycanlıların meyitlərinə qarışı da amansız vəhşiliklər törədiblər. Onlar dinc sakinləri diri-diri yandırıb, başlarını kəsib, gözlərini oyun, hamilə qadınların qarınlarını yarıb körpələrini çıxarıblar. Təəssüf ki, Xocalıda bu vəhşilikləri törədən şəxslər hələ də layiq olduqları cəzanı almayıblar. Ən önəmlisi isə BMT Təhlükəsizlik Şurasının qəbul etdiyi 4 qətnamə 27 ildir ki, yerinə yetirilmir".
Cavanşir Paşazadə söyləyib ki, Xocalı soyqırımın törədilməsində ermənilərlə yanaşı o dövrdə Azərbaycanda hakimiyyətdə olan şəxslərdə məsuliyyət daşıyırlar. 90-cı illərin əvvəllərində hakimiyyətdə olan AXCP-müsavat cütlüyünün başı hakimiyyət davasına qarışmışdı. Dövlətin və xalqın təhlükəsizliyi onları maraqlandırmırdı. Əgər xalqın istəyi ilə ulu öndər Heydər Əliyev yenidən hakimiyyətə qayıtmasaydı Azərbaycanı daha böyük bəlalar gözləyirdi. Bəlkə də bugünki Azərbaycan dövləti olmazdı. Xocalı soyqırımına ilk dəfə hüquqi qiymət də məhz ümummilli lider Heydər Əliyev tərəfindən verilib. 1994-cü il fevralın 24-də ulu öndərin imzaladığı fərmanla həmin gün xalqımıza qarşı törədilən soyqırımı aktı kimi qeyd edilməyə başlandı. Xocalı hadisələrini həm faciə, həm də xalqımızın qəhrəmanlıq salnaməsi adlandıran Heydər Əliyev şəhərin müdafiəçilərinin xidmətləri ilə bağlı sərəncam da imzaladı. Soyqırımın ildönümündə xocalılılarla görüşündə isə ulu öndər Heydər Əliyev bu hadisəni əsrin ən dəhşətli faciəsi adlandırdı".
Cavanşir Paşazadə vurğulayıb ki, Xocalı faciəsi bütün azərbaycanlıların dərdi, törədilən vəhşiliksə bütün bəşəriyyətə qarşı yönələn cinayətdir: "Məhz bu cür yanaşmadan sonra aparılan təbliğat öz nəticəsini verdi. Ümummilli liderin səyi ilə faciə lokal məkandan çıxaraq beynəlxalq səviyyədə tanınmağa başlandı. Xocalı soyqırımı ilə bağlı dünya ictimaiyyəti yetərincə məlumat əldə etdi. Xaricdə yaşayan soydaşlarımız bu işə cəlb olundu. Nəticədə isə erməni təcavüzü, onun işğalçılıq siyasəti, Azərbaycan xalqına qarşı törətdiyi vəhşilik, bir sözlə, o günə qədər dünyaya naməlum qalan çox həqiqətlərin üstünə işıq salındı. Xocalı soyqırımını dünyada 9 ölkə və ABŞ-ın 21 ştatı tam və ya parlament səviyyəsində qətliam kimi tanıyıb. Təbii ki, Xocalı soyqırımının dünyada tanınmasında cənab prezident İlham Əliyev və Birinci Vitse-prezident Mehriban xanım Əliyevanın müstəsna xidmətləri olub. Həmçinin Xocalı soyqırımının bütün dünyada tanınmasında Heydər Əliyev Fondunun Vitse-prezidenti Leyla xanım Əliyevanın "Xocalıya ədalət" kampaniyasının mühüm rolu var. Bununla bağlı bir faktı qeyd etmək istəyirəm.Bundan 8 il öncə Uqanda Respublikasında böyük tədbir keçirilirdi. İslam Parlamentləri Dostluq Qrupunun üzvü kimi mən və Sabir Rüstəmxanlı da o tədbirdə iştirak edirdik. Mənə parlamentdən zəng edib bildirdilər ki, Leyla xanım Xocalı faciəsini tədbirdə müzakirəyə çıxarmağımızı istəyir. O zaman mən bildirdim ki, əlimdən gələni edəcəm ki, Xocalı faciəsi həmin tədbirdə müzakirəyə çıxarılsın.Oradakı katiblik mənim dostum idi. Bilirsiniz ki, bu cür məsələr üçün 6-7 ay öncədən tədbir keçiriləcək ölkəyə rəsmi məktub göndərilməlidir. Yarım saat ərzində tədbirdə Xocalı faciəsi ilə bağlı məsələ qaldırıldı. 3 ölkə parlamentinin spikeri Dağlıq Qarabağ və Xocalı faciəsi ilə bağlı çıxış etdi. Təbii ki, bu Leyla xanımın Xocalı faciəsinə göstərdiyi diqqətinin nəticəsi idi. Bir sözlə 2008-ci ildən başlanılan "Xocalıya ədalət" beynəlxalq kampaniyasının əhəmiyyəti böyükdür. Belə ki, kampaniya çərçivəsində Xocalı soyqırımı ilə bağlı beynəlxalq səviyyədə məqsədyönlü təbliğat tədbirləri həyata keçirilir, Azərbaycanın haqq səsi dünyaya çatdırılır. Allahdan Xocalıda qətlə yetirilən şəhidlərimizə rəhmət diləyirəm".
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş