"Aprel zəfəri bu günə kimi düşməni qorxu içində saxlayır"-Deputat

Azərbaycan ordusunun şanlı Aprel zəfərindən 4 il ötür. Bu döyüşlərdə Azərbaycan ordusunun 90 igid və qəhrəman oğlu şəhid oldu.

Bununla bağlı Sonxeber.az-a danışan Milli Məclisin deputatı, Əmək və sosial siyasət komitəsinin sədr müavini Məlahət İbrahimqızı bildirib ki, 2016-cı ildə Azərbaycan xalqı erməni işğalçılarının təxribatının qarşısını almaq üçün mükəməl hərbi əməliyyat həyata keçirdi: "Uğurlu hərbi əməliyyatın nəticəsində Azərbaycan ordusu iki min hektardan artıq torpaqlarımızı azad etdi. Bu döyüşlər Azərbaycan tarixinə Aprel zəfəri kimi yazıldı. Bu tarix Azərbaycanın xalqının əzmini, gücünü və bir qarış torpağını erməni işğalı altında qoymayacağını göstərdi. Ordumuz işğal altında olan torpaqlarımızı azad etməyə qadırdir. Bizim Aprel zəfərimiz bu günə kimi düşməni qorxu içində saxlayır. Azərbaycan silahlı qüvvələrinin əzmi bu günə kimi təkcə erməni ordusunu deyil, eyni zamanda Ermənistan rəhbərliyini və xalqını da qorxu içində saxlayır. Beynəlxalq təşkilatlar və bütün dünya Azərbaycan ordusunun gücünü gördü. Çox təəssüf ki, Aprel əməliyyatında çox qəhrəman oğullarımızı itirdik. Hərbçilərimizin bəziləri sağlamlığını itirdi. Aprel zəfəri Azərbaycan xalqının qələbə əzmini və inamını daha da artırdı. Xalqımız əmindir ki, Ali Baş komandanımızın əmri ilə öz torpaqlarını işğaldan azad edəcək. Üç rəngli bayrağımız işğal altında olan hər bir rayonumuzda dalğalanacaq. Allah aprel şəhidləri timsalında ərazi bütövlüyü uğrunda canlarından keçən bütün şəhidlərimizə rəhmət etsin. Ailələrinə isə səbir və dözüm arzulayıram".

Aysel Yusifqızı

Telegramda izləyin

instagramda izləyin