"Sərhədlər açıldıqda koronavirusun ikinci dalğası gözlənilə bilər"- Virusologiya şöbəsi AÇIQLADI

Xəbər verdiyimiz kimi ötən gün ölkəmizdə 49 yeni koronavirus infeksiyasına yoluxma faktı qeydə alınıb. Hazırkı dövrədək ölkəmizdə 1766 nəfərin koronavirus infeksiyasına yoluxması faktı müəyyəndir, onlardan 1267 nəfər müalicə olunaraq sağalıb, 23 nəfər vəfat edib, 476 nəfərin xüsusi rejimli xəstəxanalarda müalicəsi davam etdirilir.

Epidemiologiyanın enən və qalxan dinamikası qarşıdan gələn aylarda bizə nələri vəd edir?

Bununla bğlı Sonxeber.az-a Elmi-Tədqiqat Tibbi Profilaktika İnstitutunun Virusologiya şöbəsinin müdiri, dosent Lalə Rüstəmova danışıb:

"Həqiqətən də respublikamızda koronavirus infeksiyasına görə mövcud olan epidemioloji vəziyyət, bu infeksiyanın qeydə alındığı digər ölkələrlə müqayisədə çox qənaətbəxşdir. Bunun səbəblərindən birincisi, infeksiya başlamazdan əvvəl ölkədə məhdudlaşdırıcı tədbirlərin operativ surətdə tətbiq edilməsidir. Hansı ölkədəki epidemioloji tədbirlər gecikmiş formada aparılıbsa, həmin ölkələrdə vəziyyət acınacaqlı oldu. Yəni, xəstəliyə yoluxma halları, ölüm halları çox yüksək səviyyədə oldu".

Lalə Rüstəmova xarici ölkə mütəxəssilərin fikrinə əsaslanaraq bizim ölkə üçün də epidemiyanın ikinci dalğasının gözləniləcəyini açıqlayıb:

"Mən başqa ölkələrin mütəxəssislərini fikirlərini, xəstəliyin gedişatı dinamikasını izləyirəm. Əlbəttə, mütəxəssislərin verdiyi proqnozlar ehtimal xarakterlidir. Əsl epidemioloji proqnozlar xüsusi riyazi modellər əsasında qurulan proqnozlardır. Bunun üçün konkret əldə müəyyən bir müddət üçün xəstələnmə göstəriciləri olmalıdır. Avropa mütəxəssisləri epidemiyanın ikinci dalğasının alovlanmasının payız mövsümündə gözlənildiyini bildiriblər. Bu mövsüm artıq bitir, əlbəttə ki infeksiyadan sağalan və təkrar yoluxanlar olacaq. Bir çox səbəbləri əsas gətirərək, demək olar ki, sərhədlər açıldıqda, xarici ölkələrlə, xüsusən də infeksiyanın yayıldığı ölkələrlə gediş- gəliş bərpa olunduqdan sonra çox ehtimal ikinci dalğa gözlənilə bilər. Buna baxmayaraq ölkəmiz üçün bu günə olan vəziyyəti qənaətbəxş hesab etmək olar".

Şəlalə Babayeva

Telegramda izləyin