"Liviya və Aralıq dənizində Ankaranın söz sahibi olması Qərbi narahat edir"-RƏY
Qərb erməni amilindən Türkiyəyə qarşı istifadə etməkdə davam edir. Bunu Ağ evin mətbuat katibinin "erməni soyqırımı" ifadəsinin işlətməsi və avroatlantik mərkəzlərin Türkiyə rəhbərliyinin İstanbuldakı Aya Sofya muzeyini yenidən məscidə çevirmək niyyətinin ifadə edilməsi fonunda erməni xristianlığını xatırlamaları təsdiq edir.
Türkiyənin son vaxtlar beynəlxalq səhnədəki mövqeyinin xeyli güclənməsi, Suriya və Liviya münaqişələrində, eləcə də Rusiya ilə münasibətlərin inkişaf etdirilməsində müstəqil siyasət həyata keçirməyindən ehtiyat edən və narahatlığını gizlətməyən ABŞ və Avropa İttifaqı Ankara qarşısında yenidən "erməni məsələsi"ni qabardır. Buna qarşı olaraq Türkiyənin adekvat cavabı şübhə doğurmur. Elə son günlər Türkiyə hökumətinin "erməni soyqırımı" ilə bağlı maraqlı dairələrin apardıqları təbliğatın qarşısının alınmasının müzakirəsi buna işarə edir.
Mövzu ilə bağlı politoloq Məhəmməd Əsədullazadə Sonxeber.az-a açıqlama verib.
Politoloq bildirib ki, Türkiyə hazırda müxtəlif cəbhələrdə mübarizə aparır:
Liviya, Aralıq dənizi, Suriya, İraq və digər regionlarda Ankara mövqeyini möhkəmləndirir. Məhz Liviya və Aralıq dənizində Ankaranın söz sahibi olması Qərbdə bir neçə dövlətin hərəkət etməsinə gətirib çıxarır. Ən sadə təzyiq aləti kimi qondarma erməni soyqırımından istifadə edilir.
ABŞ və Avropanın bir neçə ölkəsində bu iddianın yenidən gündəmə gəlməsi təsadüfi deyil. Bir tərəfdən Aya Sofya ilə bağlı məsələnin ortaya çıxması müəyyən dairələri ciddi narahat edir. Bir məsələni qeyd edim ki, Aya Sofya xristian məbədidir və tarixi abidə kimi qalmalıdır. Onu məscidə çevirməklə Türkiyə əleyhinə yeni mərhələ başlanacaq. Bu məsələni siyasət üçün istifadə etmək lazım deyil.
Ona görə də qardaş Türkiyə rəhbərliyi Aya Sofya ilə bağlı bu kimi fikirdən çəkilməlidir. Qeyd edim ki, artıq Ankarada ermənilərin bu təbliğatına qarşı mərkəzləşdirilmiş şəkildə hərəkət keçir.Türkiyə prezidentinin başçılığı ilə yaradılan mərkəz bunun qarşısını alacaq. Bundan əlavə Türkiyənin hazırkı siyasətini Qərb durdura bilməyəcək".
F.Ağayeva
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş