"Sosial şəbəkələrdə əsasız yayılanlara və insanları təxribata yönəldənlərə ciddi reaksiya verilməlidir"- DEPUTAT
Xəbər verdiyimiz kimi Bakının ayrı-ayrı yerlərində, küçə və prospektlərində Azərbaycan Ordusuna dəstək aksiyası keçirilib. Əllərində Azərbaycan bayraqlarını tutmuş minlərlə insan küçələrə axışaraq "Qarabağ" şüarını səsləndiriblər.Əsasən gənclərin iştirak etdiyi aksiyada habelə hərbçilərə dəstək nümayiş etdirilib, şəhidlərin xatirəsi ehtiramla yad olunub. Aksiya Şəhidlər Xiyabanına yürüşlə davam edib. Lakin yürüş təxribatçılar tərəfindən pozulub. Onlar ayrı-ayrı şuarlar səsləndirərək yürüş itirakçılarını ixtişaşa səsləyiblər.
Bununla bağlı Sonxeber.az-a danışan deputat Fazil Mustafa bildirib ki, ermənilər təkcə cəbhədə deyil, həm də daxildə olan qüvvələrini təşviq edərək Azərbaycan dövlətinə qarşı təxribatlar törədirlər:
"Şəhidlərimizi qəmli şəkildə yola salmağa və onlara duyğularını ifadə etməyə çıxmış insanları bir qrup mobil təxribatçılar başqa istiqamətə apardı. Ali hakimiyyət binasına daxil oldular. Əlbəttə olduqca düşündürücü haldır. Bu göstərdi ki, hər hansı bir siyasi qüvvə prosesi idarə edəcək gücdə deyil. İstənilən şəkildə kənardan yönəltməklə Azərbaycanı dövlətinə qarşı istifadə edə bilərlər. Dövlətin başı ordunun güclənməsinə qarışıb. Bakıda da bir qurup təxribatçı səmimi şəkildə meydana çıxmış insanları tamamilə başqa istiqamətə yönəldə bildi. Deməli insanlarımız istəmədən də olsa təxribatçıların iradəsinə tabe oldular. Ona görə də insanlar bundan çəkinməlidir. Bu 1992-ci ilin Xocalı hadisəsini xatırlatdı. Diqqət edirsinizsə əsgərin və polisin şəkillərini ayrıca verərək fərqli münasibətin göstərilməsi də daxildə olan güvənsizliyi artırmaqdır. Ona görə də bu məsələdən ibrət götürülüb. Çox ciddi tədbirlər görülməlidir. Milli Məclisin binasına girənlərlə bağlı çox ciddi addımlar atılmalıdır. Bu məsələ cəmiyyətdə ictimai və siyasi qüvvələr tərəfindən ciddi müzakirə olunmalıdır. Çünki orduya dəstək verən insanlar bu cür addımlar atmırlar. İki gün öncə eyni şey Lökbatan dairəsində də təkrarlanmışdı. Səmimi şəkildə şəhidinə ağlayan, orduya dəstək verən insan seçilir. Başqa niyyətli insanlar öz fikirlərini ortaya qoydular. Çünki şəhidi üçün ağlayan oraya gələn və gəlməyən milyonlarla insanlarımız vardı. Amma bir qrup insan ölkədə sabitliyi pozmaq üçün təxribatlara əl atdılar. Ona görə də insanlarımız diqqətli olmalıdır. Sosial şəbəkələrdə yayılanlara və onları təxribata yönəldənlərə ciddi reaksiya verməlidir. Dünən polis maşınını dağıdanlar və hörmətsizlik edənlər də oldu. Polis xeyli nəzakətli davrandı. Bu gün polisi qınayan da utanmalıdır. Çünki gecə polis də vətəndaşın təhlükəsizliyini qoruyur. Sənin, mənim və başqalarının təhlükəsizliyi üçün polislər gecə oradaydı. Düşünürəm ki, bu çox ibrət götürüləsi hadisədir. Biz bu hadisəni çox ciddi şəkildə müzakirə edib, ona obyektiv qiymət verməliyik. Burada dövləti sevənlər və qarşı olanlar müəyyən edilməlidir".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş