Yolxucu xəstəlik TƏHLÜKƏSİ - DİQQƏT

Dövlət Baytarlıq Nəzarəti Xidməti İranla həmsərhəd olan rayonlarda heyvanlar arasında dabaq xəstəliyinin yayılma riski yüksək olduğundan, iri və xırdabuynuzlu heyvanların kütləvi vaksinasiyasının aparılmasına aydınlıq gətirib.

DBNX-nin mətbuat xidmətinin rəhbəri Yolçu Xanvəli açıqlamasında ölkənin hər hansı bölgəsində heyvanlar arasında xəstəlik aşkarlanmadığını bildirib. Onun sözlərinə görə, sadəcə qonşu ölkələrdə dabaq xəstəliyinin yayılması ilə əlaqədar olaraq vaksinasiya işləri aparılır: "Kənd Təsərrüfatı Nazirliyi yanında Dövlət Baytarlıq Nəzarəti Xidməti (DBNX) iyun ayının əvvəlindən ölkə üzrə iribuynuzlu heyvanlarda dabaq xəstəliyinə qarşı kütləvi peyvəndləmə tədbirinə başlanıb. Heyvanlar arasında peyvəndləmə tədbirləri Ümumdünya Heyvan Sağlamlığı Təşkilatının (BEB) tövsiyələrinə və ölkəmizin epizootik tədbirlər planına uyğun olaraq aparılır. Respublikamızda dabaq xəstəliyinə qarşı aparılan vaksinasiyanın məqsədi heyvanlar arasında xəstəliyin qarşısının alınmasıdır".

Onun sözlərinə görə, Dövlət Baytarlıq Nəzarəti Xidməti Kənd Təsərrüfatı Nazirliyi tərəfindən təsdiqlənmiş epizootik tədbirlər planına uyğun olaraq təkcə cənub yox, eləcə də qərb-şərq bölgəsində, bir sözlə bütün ölkə üzrə vaksinasiya tədbirləri aparılır: "Son zamanlar dünyanın bir sıra ölkələrində, o cümlədən ölkəmizlə həmsərhəd olan dövlətlərdə dabaq virusunun yeni A (Genotype VII) serotipi yayılıb. Qonşu ölkələrdə (Ermənistan, İran və s.) bu xəstəliyin alovlanmasının mövcudluğu infeksiyanın Azərbaycan ərazisinə keçməsinə təhlükə yaradır. Dabaq xəstəliyinin yeni tipinin ölkəmizə keçməməsi üçün bütün zəruri tədbirlər görülüb. Bu məqsədlə Kənd Təsərrüfatı Nazirliyi Türkiyənin ŞAP İnstitutu tərəfindən istehsal edilən yeni vaksinin alınması üçün Türkiyə Respublikasının Kənd Təsərrüfatı Nazirliyinə müraciət edib. Türkiyənin Kənd Təsərrüfatı Nazirliyi bu müraciəti dəyərləndirərək ölkəmizə qardaşlıq yardımı olaraq 500000 ( beş yüz min) doza miqdarında dördvalentli dabaq vaksini verib. Yardım kimi gətirilmiş vaksinlər ilkin olaraq İran, Ermənistan, Gürcüstan dövlətləri ilə həmsərhəd olan rayonların sərhəd yaşayış məntəqələrində saxlanılan heyvanlara tətbiq olunur və tam nəzarət həyata keçirilir. Ölkəmizin sərhəd zonalarından infeksiyanın respublikanın ərazisinə keçməməsi üçün müvafiq tədbirlər yerinə yetirilir, sistematik peyvəndləmələr, dezinfeksiyalar aparılmaqla, həmsərhəd ölkələrlə immun zona yaradılır və bir sıra başqa tədbirlər həyata keçirilir".

Y.Xanvəli bildirib ki, Dövlət Xidməti bu günlərdə iribuynuzlu heyvanlar arasında start verilmiş dabaq xəstəliyinə qarşı aparılan tədbirlərlə bağlı əməkdaşlarını bölgələrə ezam edib. Xidmətin əməkdaşları yerlərdə vaksinlərin heyvanlara vurulması üçün baytarlıq mütəxəssislərinə lazımi tövsiyələr veriblər. Rayon (şəhər) baytarlıq idarələri və sahə baytarlıq məntəqələri dabaq xəstəliyinin A-Nepal84,A,O,Asiya-1 tiplərinə qarşı istifadə edilən vaksinlər, biotəhlükəsizlik vasitələri və dezinfeksiya maddələri ilə təmin olunub. (publika.az)

Telegramda izləyin