"Bütün torpaqlarımızı işğaldan azad edəcəyik" - DEPUTAT

"Sentyabrın 27-si səhər saat 6-dan başlayaraq Ermənistanın növbəti təxribatı ilə qarşılaşdıq".

Bunu Sonxeber.az-a danışan deputat Kamilə Əliyeva bildirib.

Deputat qeyd edib ki, yenə də ermənilər dinc əhalini ağır artilleriyadan atəşə tutublar:

"Mülki əhali arasında həlak olan və yaralananlar var. Ermənilərin törətdiyi təxribat nəticəsində bir ailənin 5 üzvü həlak olub. Ermənilərin bu təxribatları davamlı şəkildə müşahidə olunur. Lakin ordumuz Ali Baş Komandanın rəhbərliyi ilə düşmən təxribatına qarşı əks hücuma keçib. Böyük nailiyyətlər əldə etdik. Bir gün ərzində, sutka tamam olmamış, 7 kəndimiz, Murov və bir sıra strateji yüksəkliklərimiz azad edildi. Azərbaycan ordusu bu kimi uğurlara imza atır. Döyüşlər bu gün də davam edir".

Deputat vurğulayıb ki, 30 il davam edən danışıqlar heç bir nəticə vermirdi:

"Məhz buna görə də Ali Baş Komandan tərəfindən əks hücuma keçmək barəsində qərar qəbul edildi. Bu gün də müxtəlif beynəlxalq təşkilatlar, ATƏT-in Minsk Qrupu və digər dövlətlər Azərbaycanı münaqişənin danışıqlar yolu ilə həll olunmasına dəvət edirlər. Biz yaxşı bilirik ki, bu danışıqların heç bir əhəmiyyəti olmayacaq. Artıq bu son hədd idi. Güclü ordumuzun iradəsi sayəsində biz bu nailiyyətləri əldə etmiş olduq. Düzdür, şəhidlərimiz də var. Allah şəhidlərimizə rəhmət eləsin. Artıq müharibədir. Vətən uğrunda müharibədə şəhid də verilir. Amma bilirik ki, şəhidlərimizin qanı yerdə qalmayacaq! Biz torpaqlarımızı qorumaqla həm də işğalda olan rayonlarımızı azad edəcəyik".

Deputat əlavə edib ki, cənab Prezidentin söylədiyi kimi heç bir rayonumuz işğalda qalmayacaq:

"Bütün torpaqlarımızı işğaldan azad edəcəyik. Bu əzm Azərbaycan ordusunda var. Bu gün Ali Baş Komandan böyük iradə göstərir. Onun iradəsi nəticəsində ordumuz torpaqlarımızı işğaldan azad edəcək. Biz buna hamımız inanırıq. Ölkəmizdə qismən səfərbərlik elan edilməmişdən əvvəl, yaşından asılı olmayaraq, hər bir azərbaycanlı könüllü orduya yazılırdı. Hətta qadınlarımız belə, könüllü orduya getmək istəyirlər. İnsanlarımızda yüksək döyüş əhval-ruhiyyəsi var. Cəbhə bölgəsində yaşayan vətəndaşlarımızın biri də evini tərk etməyib. Düşmən tərəfinin atdığı atəşlər bizim vətəndaşlarımızı qorxutmur. Çünki insanlarımız ordumuza və Ali Baş Komandanımıza inanır. Bu gün hər birimiz cənab Prezidentin ətrafında sıx birləşərək dayaq olmalıyıq ki, başladığımız mübarizəni sona kimi davam etdirib, qələbə bayrağımızı Şuşada, Kəlbəcərdə və digər işğal olunmuş torpaqlarımızda dalğalandıraq".

Aysel Yusifqızı

Telegramda izləyin

instagramda izləyin