Ermənilər hansı ŞƏRTLƏ Qarabağda yaşaya bilər? - AÇIQLAMA

"Cəbhədə, diplomatiyada və mətbuat sahəsində konkret istiqamətdə apardığımız fəaliyyət nəticəsində əks-hücum əməliyyatımız uğurla nəticələnib".

Bu sözləri Sonxeber.az-a danışan deputat Ramil Həsən deyib.

Deputat vurğulayıb ki, bu, Azərbaycan üçün böyük qələbədir:

"30 illik həsrətdən sonra Azərbaycan dövləti doğma torpaqlarına qovuşdu. Cəbhədə, diplomatiyada və mətbuat sahəsində konkret istiqamətdə apardığımız fəaliyyət nəticəsində əks-hücum əməliyyatımız uğurla nəticələnmdi. Buna görə də başda Ali Baş Komandan olmaqla, müzəffər əsgərlərimiz, diplomatlarımız və jurnalistlərimiz Vətən torpağı üçün nə qədər əziyyət çəkibsə, Allah onlardan razı olsun. Fəxr etmək lazımdır ki, artıq uduzan, itirmiş torpaq sahibi olan azərbaycanlı deyil, uğur qazanmış, döyüş meydanında şücaətlə vuruşan, ərazi bütövlüyümüz üçün canlarını fəda edən və zəfər yürüşü ilə bu müharibədən çıxan dövlətin vətəndaşlarıyıq. Yerləşdirmə və məskunlaşma məsələsinə gəldikdə isə, açıq və əminliklə deyə bilərəm ki, Azərbaycan xalqı humanist və böyük ürəyə sahib olan millətdir. Nə qədər çətinlik yaşasaq da, öz böyüklüyümüzü qoruyaraq, erməni kimi millətin səviyyəsinə enməmişik. Bu baxımdan da dövlətimizin həyata keçirdiyi və keçirəcəyi məskunlaşma siyasəti çərçivəsində və qanunlara hörmətlə yanaşma istiqamətində müvafiq qurumlar lazımi addımlar atacaq".

Deputat vurğulayıb ki, məskunlaşma formatında ermənilərlə azərbaycanlıların hansı formada yaşayacağı ilə bağlı konkret fikir səsləndirmək çətindir:

"Zamanla məsələ öz həllini tapacaq. Amma rəsmi məlumatlarda qeyd olunur ki, yalnız Azərbaycan vətəndaşlığını, qanunlarını qəbul edən ermənilər burada yaşayacaqlar. Buna görə də yaddan çıxarmamalıyıq ki, dünya irəliyə doğru addımlayır. Biz bu gün uğur qazanaraq torpaqlarımızı işğaldan azad etmişik. Xocavənd və digər rayonlarda polis idarələri yaradılır. Bundan sonra məskunlaşma qanunlarla və BMT-nin Ali Komissiyasının tərtib etdiyi siyahı çərçivəsində, Azərbaycan dövlətinin idarətçiliyi əsasında həyata keçiriləcək.

Azərbaycan 30 il öncəki dövlət deyil. Azərbaycanlılarla ermənilərin məskunlaşması məsələsi yüksək səviyyədə öz həllini tapacaq. Əgər orada milli azlıq kimi yaşayacaq ermənilər Azərbaycan qanunlarından kənar addımlar atacaqlarsa, məsuliyyətə cəlb olunacaqlar. Əhalimiz buna görə narahat olmasın. Azərbaycan artıq 90-cı illərin əvvəlləridəki kimi zəyif deyil. Sovet İttifaqı artıq yoxdur".

Deputat dövlətimizə və cənab Prezidentimizə güvənməli olduğumuzu da qeyd edib:

"Əmin olaq ki, torpaqlarımızın bütün sərhədlərini Azərbaycan ordusu qoruyacaq. Başqa dövlətin ordusu qorumayacaq. Bunu Azərbaycan vətəndaşları anlamalıdırlar. İnsanlarımız əmin olsun ki, ermənilərin "at oynatdığı" məkan artıq yoxdur. O məkan və status cəhənnəmə gedib! Biz Vətən müharibəsi zamanı Ali Baş Komandana inananaraq birləşib, dəmir yumruq şəklində düşmənin başını necə əzmişiksə, bundan sonra da belə olmalıyıq. Ölkəmizin güclənməsi istiqamətində atılan addımlara kölgə salmaq istəyənlərə biz imkan verməməliyik. Dağlıq Qarabağ artıq düşmən tapdağından azad edilib. Yaxın zamanda insanlarımız oraya köçürüləcək və həmin ərazilərin çiçəklənməsi istiqamətində bütün addımlar atılacaq".

Aysel Yusifqızı

Telegramda izləyin