Vətəndaşlarımız Qarabağa nə zaman köçürüləcək? - AÇIQLAMA

Sentyabrın 27-də başlayan və 44 gün davam edən Vətən müharibəsi Azərbaycanın qələbəsi ilə nəticələnib. Bu gün hər kəsi maraqlandıran sual məcburi köçkünlərimizin öz doğma dədə-baba yurdlarına nə zaman köçürüləcəyi ilə bağlıdır. Vətəndaşlarımızın köçürülməsi nə zamandan reallaşa bilər?

Bununla bağlı Sonxeber.az-a danışan deputat Cavid Osmanov bildirib ki, 2020-ci ilin sentyabrında başlayan və 44 gün davam edən Vətən müharibəsi Azərbaycanın parlaq qələbəsi ilə başa çatdı:

"Əlbəttə ki, 44 günlük müharibə 30 illik həsrətə son qoymaqla yanaşı, Azərbaycan xalqının qürurunu da özünə qaytardı. Müzəffər Ali Baş Komandanımız cənab İlham Əliyevin düzgün qurduğu strategiya əsasında döyüş meydanında Azərbaycanın igid və qəhrəman oğulları, zabitləri Ermənistan ordusunu darmadağın edərək torpaqlarımızı işğaldan azad etməyə nail oldular. Eyni zamanda cənab Prezidentimizin şəxsən rəhbərlik etdiyi diplomatik və informasiya müharibəsində də Azərbaycan parlaq qələbə qazandı. Əldə edilən qələbə nəticəsində Ermənistanın həm də kapitulyasiyası elan edildi. Eyni zamanda noyabrın 10-da üçtərəfli bəyanat imzalandı. Bu gün yeni mərhələ başlayıb. Hazırda cənab Prezidentin tapşırığı ilə işğaldan azad olunmuş rayon və şəhərlərin yenidən qurulma və bərpası işləri aparılır. Bu bərpa işləri mərhələli şəkildə icra ediləcək. Cənab Prezidentimiz də bir neçə dəfə qeyd edib ki, ilk növbədə təhlükəsizlik məsələləri həll edilməlidir, yəni minalardan təmizlənmə, Ermənistanın dağılmış ordusunun qalıqlarının Azərbaycan ərazilərindən çıxarılması həyata keçirilməlidir. Daha sonra isə qiymətləndirmə - 30 il ərzində işğaldan azad olunmuş ərazilərə vurulan ziyanın hesablanması - mərhələsidir. Bu hesablamalar başa çatdıqdan sonra beynəlxalq hüquq müstəvisində Ermənistandan təzminat tələbi irəli sürüləcək. Bundan sonrakı mərhələ bərpa etmə işləri və idarəetmə mexanizminin qurulmasıdır".

Deputat vurğulayıb ki, cənab Prezidentin sərəncamına əsasən, bununla bağlı xüsusi qərargah da yaradılıb:

"Qərargaha Prezident Administrasiyasının başçısı rəhbərlik edir. Bu baxımdan yenidənqurma və bərpa işləri mərhələli şəkildə icra ediləcək. Artıq infrastruktur layihələrinin işlənilməsinə başlanılıb. Cənab Prezident Azərbaycanın Birinci vitse-prezidenti Mehriban xanım Əliyeva ilə birlikdə işğaldan azad edilən ərazilərə səfərləri çərçivəsində artıq bir neçə infrastruktur layihələrinə start verilərək təməli qoyuldu. Burada dəmir yolu xəttinin, Şuşaya nəqliyyat yolunun çəkilməsi, Füzulidə hava limanının tikintisi, işıqlandırma və digər ən vacib infrastruktur layihələrinin icrası planlaşdırılır. Cənab Prezidentin vurğuladığı kimi, "ağıllı şəhər" və "ağıllı kənd" layihələri də həyata keçiriləcək. Artıq Zəngilan rayonunun Ağalı kəndi "ağıllı kənd" kimi təqdim olunub".

Deputat qeyd edib ki, işğaldan azad edilən ərazilərdə aparılan yenidənqurma işləri Azərbaycanın qüdrətini göstərməklə yanaşı, "ağıllı şəhər", "ağıllı kənd" layihələri ilə cənab Prezidentin rəhbərliyi sayəsində ölkəmizin müasir ölkəyə çevrilməsindən xəbər verir.

Eyni zamanda burada vacib olan məqamlardan biri də 30 il ərzində öz dədə-baba yurdundan didərgin düşən vətəndaşlarımızın həmin ərazilərə qaytarılmasıdır. Əlbəttə, vətəndaşlarımızın köçürülməsi üçün onların rahat yaşayışını təmin edəcək bütün infrastruktur, insanların məşğulluğu və xidmətlər bərpa edilməlidir. "Ağıllı şəhər" və "ağıllı kənd" layihələrinin çərçivəsində bütün xidmət sektorunun həmin ərazilərdə olması nəzərdə tutulur. Bu baxımdan da bizim vətəndaşlarımızın öz doğma dədə-baba yurdlarına köçürülməsi mərhələli şəkildə icra ediləcək. Biz bilirik ki, ermənilər torpaqlarımızı işğalda saxladıqları müddətdə orada daşı daş üstə qoymamışdı. Hətta elə ərazilər var idi ki, bayraq sancmağa yer yox idi. Əlbəttə, bütün infrastruktur qurulduqdan sonra vətəndaşlarımızın həmin ərazilərə mərhələli şəkildə köçürülməsinə başlanılacaq".

Aysel Yusifqızı

Telegramda izləyin

instagramda izləyin