Patrik Hikki günahkar çıxdı

Rio-2016-da qanunsuz bilet alverində təqsirli bilinərək saxlanılan Avropa Olimpiya Komitəsinin prezidenti Patrik Hikkinin günahkar olduğunu təsdiqləyən faktlar aşkarlanıb.

Bunu Braziliyanın Rio-de-Janeyro şəhərinin polis idarəsindən açıqlayıblar.

Eyni zamanda İrlandiya Olimpiya Komitəsinin rəhbəri olan 71 yaşlı funksioner daha 4 nəfərlə birlikdə həbsdə saxlanılır ki, onlardan biri İngiltərə "İpsviç" futbol klubunun rəhbəri Mark Evansdı.

Braziliyalı müstəntiq Rikardo Barbosa keçirdiyi mətbuat konfransında Hikkinin məhz Evansla əlaqələr üzündən "ilişdiyini" bildirib: "Əlimizdəki dəlillər, ilk növbədə də elektron məktublar Patrik Hikkinin Mark Evansla əlaqədar olduğunu təsdiqləyir. Sonuncu THG şirkətinin rəhbəri, Hikki isə İrlandiya Olimpiya komitəsinin prezidentidi. Bütün qanunsuz bilet satışının təşkilatçısı da THG şirkətidi. Bu cinayətkarlar sisteminin əsas işi biletləri rəsmi qiymətindən daha yuxarı satmaqdı. Onlar bunu qonaqpərvərlik proqramı adı altında gizlədirlər".

THG şirkətinin direktoru Kevin Mallonun həbsindən sonra daha da genişlənən istintaq Hikki və Evans daxil olmaqla 7 nəfərin saxlanılması ilə nəticələnib. Mallonun əlində yaxalanan yüzlərlə bilet arasında Olimpiya Oyunlarının açılış mərasimi üçün nəzərdə tutulanlar da olub. Nominal qiyməti 1400 dollar olan bu biletlərin "qara bazar"da 8000 dollara satılması planlaşdırılıb.

Qeyd edək ki, istintaq nəticəsində İrlandiya Olimpiya Komitəsinin daha 3 əməkdaşı da saxlanılıb. Bunlar nümayəndə heyətinin rəhbəri Kevin Kilti, baş katib Dermot Henihan və Stiven Martindir.

* * *12:00

Avropa Olimpiya Komitəsinin prezidenti və eyni zamanda İrlandiya Olimpiya Komitəsinin rəhbəri Patrik Hikki Rio-de-Janeyroda həbs olunandan sonra onu əvəzləyən Uilyam O‘Brayenin də həbsinə sanksiya verilib. Lakin o, Brazliyanı tərk etməyə imkan tapıb.

Bu barədə Rio oyunlarında bilet alveri işini aparan müstəntiqlərdən biri Aloyzyu Falkao keçirdiyi mətbuat konfransında bildirib.

Patrik Hikki həbs olunandan sonra İrlandiya Olimpiya Komitəsinin prezidenti vəzifəsində onu Uilyam O‘Brayen əvəzləyib. Həmin vaxt o da Rio-de-Janeyroda olub. Braziliya polisi müəyyən edib ki, Patrik Hikkinin qurduğu bilet alveri sxeində Uilyam O‘Brayen də yer alıb. "Onun Patrik Hikki ilə əlbir olduğuna dair çoxsaylı dəlillər var"-müstəntiq deyib.

Prokuror Uilyam O‘Brayenin həbsi üçün sanksiya verib və ötən bazar günü onu həbs etmək üçün polislər gedib. Lakin məlum olub ki, Uilyam O‘Brayen həbs olunacağından xəbər tutaraq Braziliyanı tərk etməyə imkan tapıb. Müstəntiq deyib ki, onun istintaqa cəlb olunması üçün İrlandiya hökumətindən kömək istəyəcəklər. Patrik Hikki isə hazırda Rionun Banqu həbsxanasında saxlanılır.

Telegramda izləyin

instagramda izləyin