Azərbaycanda vəzifəli şəxs ölümlə hədələnir - DİN-ə müraciət edildi

Xəzər Universitetinin İctimayətlə Əlaqələr və Mətbuat Xidmətinin rəhbəri Əlövsət Əmirbəyli qonşusu tərəfindən ölümlə hədələnir.

Bu barədə HİT.Az-a Əlövsət Əmirbəylinin yaxınları məlumat verib.

Məlumatı saytımıza verən mənbə deyib ki, hədələnməyə səbəb Əlövsət Əmirbəyli də daxil Keşlə qəsəbəsi Yarış küçəsinin bir qrup sakininin Daxili İşlər Nazirliyinə (DİN) və Nizami rayon Polis İdarəsinə və digər qurumlara ünvanladıqları müraciət olub.

Məsələnin kökünə gəlincə, mənbə qeyd edib ki, məhəllə sakinləri 3 ilə yaxındır ki, evlərində rahat yaşa bilmirlər. Qayınanasının evində məskunlaşan qonşulardan biri həyətdə qanunsuz şəkildə müxtəlif avtomobillərin təmirini və satışını həyata keçirir. Qəza törətmiş avtomobilləri belə gizli şəkildə təmir edir. Məhəllədə heç kəsə əhəmiyyət vermədən günün müxtəlif saatlarında narkotik satışını həyata keçirir, gecələr isə təmirə saxladığı maşınlarda tanışları ilə qrup halında narkotikdən istifadə edir. Məhəllənin xanımları işə getməyə, uşaqları isə küçədə oynamağa qorxurlar. Dəfələrlə xəbərdarlıq edilməsinə baxmayaraq, heç bir nəticə olmayıb. Hətta ona qarşı çıxanları gecə yatağında öldürməklə hədələyib.

HİT.az məsələ ilə bağlı Əlövsət Əmirbəylinin özü ilə də əlaqə saxlayıb. O, məlumatı təsdiqləyərək bildirib ki, 3 ildir qapı qonşusu olan Habil Novruzovun qanunsuz hərəkətlərinə dəfələrlə etiraz etməsinə baxmayaraq, heç nə dyişməyib.

"Dünən axşam saat 20:30 radələrində avtomobil boyama işini həyata keçirirdi. Boyanın qoxusundan evin 2-ci mərtəbəsində oturmaq mümkün deyildi. Dayandırmağı tələb etdim. Ən pis söyüşlərlə məni təhqir etdi və öldürməklə hədələdi. Mən və 9 qonşu DİN-nin "102 xidməti"nə və sahə müvəkkilinə şikayət etdik. Müraciətimiz "102 xidməti" tərəfindən qeydə alındı. Bildirildi ki, bu gün izahatlarımızı alacaqlar. Ümid edirik ki, polisin müdaxiləsi ilə problem həllini tapacaq", - deyə Əlövsət Əmirbəyli əlavə edib.

Telegramda izləyin

instagramda izləyin