Big.az və Sonxeber.az saytlarının qurucusu Namiq Abdullayevlə SƏMİMİ MÜSAHİBƏ

Həyat hər bir insana uğur qapılarına doğru yollar göstərir, lakin bir çoxları o yolları çətin bilib, daha rahat yolun ardınca qaçır, sonda isə uğursuzluğun səbəbini başqalarında axtarmağa başlayır, daim kimisə nədəsə günahlandırırlar.

Halbuki insan həyatının bütün məsuliyyətini öz üzərinə götürüb var gücüylə çalışsa, uğur qapısına çatar və o qapının açarlarını əldə edər.

Bu yol barədə isə onu qət edənlər daha çox bilər. Uğurun sirləri, açarları nədədir?

Suallarımıza cavab tapmaq və uğurlu insanların həyatını araşdırmaq üçün "Uğurun sirləri" silsiləsini davam etdiririk.

Növbəti qonağımız isə "Big Group" şirkətininin gənc və istedadlı rəhbəri, BiG.AZ saytının qurucusu Namiq Abdullayevdir.

Bu gün 35 yaşı tamam olan bu adam artıq 16 ildir ki, "BİG Group" şirkətinə rəhbərlik edir.

Fəaliyyət göstərdiyi illər ərzində Namiq Abdullayev müxtəlif mükafatlarla təltif olunub.

Qeyd edək ki, artıq 16 il uğurla fəaliyyət göstərən "BİG Group" şirkətinə bu gün 15-ə yaxın layihə daxildir. Onlardan 3-ü xəbər portalıdır (BiG.AZ, Sonxeber.az, izle.az), digərləri isə (unvan.az, vipemlak.az, sebet.az, servis.az, webpage.az və s.) ticari layihələrdir.

BiG.AZ saytı olaraq bu istedadlı insanı daha yaxşı tanımaq və tanıtmaq üçün ona suallarımızı ünvanladıq:

- Hər şey necə başladı? Niyə məhz sayt işiylə məşğul olmağı seçdiniz?

- Hər şey BiG.AZ saytını qurmaqla başladı. 2004-cü ildə Azərbaycan Dövlət İqtisad Universitetinə yeni daxil olmuşdum. Bu zaman sayt qurmaq qərarına gəldim. BiG.AZ saytı yarandığı ilk günlərdən populyarlıq qazandı. Artıq 16 ildir ki, BiG.AZ saytı fəaliyyət göstərir. O dövrlər sayt az idi, və bu, Azərbaycan internet aləminə fərqliliklər gətirmişdi. Təbii ki, populyar olduğu üçün dağıtmaq istəyənlər, haker hücumu edənlər də çox oldu. Sağ olsunlar, onların sayəsində özümü daha da inkişaf etdirib, BiG.AZ saytının günümüzədək gəlib çıxmasına nail ola bildim. 2009-cu ildə əsgərlikdən gələndən sonra BiG.AZ saytının uğurlu olduğunu gördükdə bu sahəni daha da genişləndirmək qərarına gəldim və zamanla Sonxeber.az, Xanim.az, Unvan.az, Sebet.az, Servis.az, Turlar.az və digər layihələri qurub şərikimlə birlikdə inkişaf etdirdik.

- Bu yolda ən böyük dəstəyi kimdən gördünüz?

- Hər şey sıfırdan başlamışdı, işlədikcə saytın xərclərini ödəyirdik, xüsusi dəstək almamışdıq. Arxadakı körpüləri yandırmışdıq, irəli getməkdən başqa yolumuz yox idi.

- Sizi bu seçimdən çəkindirənlər oldumu? Hazırda onlar nə düşünür?

- Əvvəlcə yaxın ətrafım, valideynlərim belə, nə işlə məşğul olduğumu başa düşmürdülər. Anam həmişə deyirdi: "Get, özünə normal iş tap. Bu nədir? Oturmusan bütün gün kompüterin qabağında!" O vaxt İnternetdə pul qazanmaq qeyri-mümkün görsənirdi. Lakin mən həmişə internetin gələcəyinə inanırdım. Hər hansı bir plan qurduqda dərhal nəticə verəcəyini gözləmirəm. Necə deyərlər, səbir gec bar verən, lakin meyvəsi şirin olan ağacdır.

- Seçiminizə peşman olmusunuzmu? Hər şeyi atıb, başqa işlə məşğul olmağı düşünmüsünüzmü? Başqa peşə seçsəydiniz, nə işlə məşğul olardınız? "İndiki ağlım olsaydı..." cümləsini necə tamamlayardınız?

- Keçmişi yaşamasaydım, indiki ağlım olmazdı. Tam doğru sahəni seçdiyimi düşünürəm. Əlbəttə ki, indiki ağlım olsaydı, daha fərqli işlər görərdim, amma hələ də gec deyil.

- Fikirləriniz çox doğrudur. Etdiklərimiz ya uğur, ya təcrübədir. Əlbəttə, fərqli işlər görmək üçün heç vaxt gec deyil. Bəs siz özünüz səhvlərinizə uğursuzluq, yoxsa təcrübə kimi baxmısınız?

- Düz istiqaməti tapmağın yolu SƏHVLƏRDƏN keçir. Səhv etməyən adam iş görməyən adamdır. Səhvlərdən nəticə çıxarırsansa, bu olur TƏCRÜBƏ.

- Bu yolda hansı çətinliklərlə qarşılaşmısınız? Ən çətin anınız hansı olub?

- Layihələr çox olduğu üçün problemlərin sayı da az olmayıb. Ən çətin anlar 2020-ci ildə başlayan Vətən müharibəsi dövründə yaşandı. Saytın reytinqi və izlənilməsi yüksək olduğu üçün erməni və rus hakerlər tərəfindən saytlara müdaxilə cəhdləri oldu. Həmin dövr həm də informasiya müharibəsi dövrü idi: hər gün gecə saat 3-4-ə kimi oyaq qalırdıq. Əldə olunan informasiyanın düzgünlüyünü yoxlayırdıq.

- Yıxıldıqda yenidən qalxıb davam etmək, təslim olmamaq üçün nə etmək lazımdır?

- İnadkar və tərs olmaq lazımdır. Anam uşaqlıqdan mənə "tərs oğlu tərs" deyərdi. Sən demə, bu xasiyyət mənə kömək olub.

- Sizin üçün nümumə olan, sizi ruhlandıran kimdir?

- Xarici iş adamlarını və milyarderləri çox izləyirəm. Toni Robbins və Robert Kiosakini daha çox bəyənirəm. Adamlar xoşbəxt yaşamağın yolunu tapıblar.

- Həyatınızı və özünüzü bir cümlə ilə vəsf edin.

- İnanıram ki, alınacaq!

- Pula münasibətiniz? Əl çirki ya...?

- Pul gördüyümüz işlərin nəticəsidir. Əl çirki olması adətən kasıb adamların "təsəlli"sidir. Pul hər şey olmasa da, çox şeyi həll edir.

- Kitab ya film?

Əlbəttə, kitab. Filmə son baxdığım yadıma gəlmir, baxanda da "2x sürət"lə baxıram. Adətən biznes mövzusunda olan videoları, kursları izləyirəm.

- Azərbaycan ya xarici ölkə?

- Azərbaycan Vətənimizdir, hər şeyə görə ona borcluyuq. Xarici ölkələrdən ruhu bizə yaxın olan Türkiyəni bəyənirəm.

- Boş vaxtınızı necə keçirirsiniz?

- Biznes mövzusunda kitab oxuyur, video və kurslara baxıram.

- Xoşbəxtlik nədir? Xoşbəxtsinizmi?

- Xoşbəxtlik insanın problemdən uzaq olub, öz istədiyini etməsidir. Həyatda qoyduğum hədəflərin çoxuna çatdığıma görə özümü xoşbəxt hesab edirəm.

- Azadlıq nədədir?

- Məkandan, insanlardan asılı olmayaraq yaşamaq.

- İnsanlarda ən çox nəyə önəm verirsiniz?

- Ən çox dəyər verdiyim insanların etibarlı, düzgün olmalarıdır. Bunlar olmasa, digər xüsusiyyətlər mənasızdır.

- Əvvəlki gənclərlə indiki gənclərin fərqi nədədir? Mənfi və müsbət cəhətləri? Gənclərə məsləhətləriniz?

- İndiki gənclər bir addım öndədirlər, texnoloqiyanın inkişaf vaxtına düşüblər. İndi pul qazanmaq, biznes qurmaq daha asandır. Vaxtlarının qədrini bilsinlər.

- Çox gözəl məsləhətdir. Bəs sizin həyat şüarınız nədir? Sizcə, uğurunuzun sirri nədədir?

- Uğurun sirri məqsədə doğru durmadan irəliləməkdədir. Əgər bir adam bir işlə 10000 saat məşğul olsa, o sahədə 100% uğur qazanacaq. Məndə də belə olub. Çox olub, saytın və işçilərin xərclərini ödəmişik, özümüzə heç nə qalmayıb, lakin buna baxmayaraq, davam etmişik.

- Gələcək planlarınız?

- "Big Group" tərkibində çox layihələr var. Görüləcək işlər çoxdur. Qurulan layihələrin inkişafı üçün hər gün çalışırıq.

- Vaxt ayırıb suallarımızı cavablandırdığınız üçün minnətdarıq. Qoyduğunuz bütün məqsədlərə nail olmağınızı, səsinizin daim ucalardan gəlməsini diləyirik.

- Təşəkkürlər.

Natəvan Baxşiyeva

Telegramda izləyin

instagramda izləyin