"Jirinovski öz çıxışına görə üzr istəməlidir" - AÇIQLAMA
"Jirinovskinin "Komsomolskaya pravda"ya verdiyi müsahibəsi qəbuledilməzdir və qarayaxma kompaniyası xarakteri daşıyır".
Bu sözləri Sonxeber.az-a açıqlama verən politoloq İlyas Hüseynov deyib.
O bildirib ki, Jirinovski öz çıxışına görə üzr istəməlidir:
"Rusiyada Jirinovski kimi şəxslər və ona yaxın dairələr 44 günlük İkinci Qarabağ müharibəsindəki qələbəmizi hələ də həzm edə bilmir. Bu istiqamətdə müxtəlif materiallar paylaşılır. İnformasiya seqmentində Azərbaycanı istəməyən qüvvələr Rusiya-Azərbaycan münasibətlərinə xələl yetirirlər. Burada erməni lobbisinin də mühüm təsiri var.
Erməni lobbisi əsasında fəaliyyət göstərən kütləvi informasiya vasitələri və onların maliyyəsindən qaynaqlanan media mənsubları Azərbaycan əleyhinə müxtəlif yazılar dərc edirlər. Biz bunun mütəmadi, sistematik şəkildə baş verdiyini görürük. Jirinovskinin də çıxışı Azərbaycan əleyhinə edilən çıxışlar silsiləsindəndir. Eyni zamanda, Jirinovskinin çıxışı həm də müasir beynəlxalq münasibətlər sistemində iki ölkə arasındakı bərabər hüquqlu münasibətlərə də mənfi təsir göstərir. Bu, Azərbaycan-Rusiya münasibətlərini dərindən sarsıdan bir çıxışdır. Ona görə də belə çıxışlara Rusiya dövləti düzəlişlər etməli və bu düzəlişlər siyasi xarakter daşımalıdır.
Jirinovski kimi siyasətçilər hələ ötən əsrdən öz aktivlikləri ilə seçiliblər. Müasir dünyada hər şey dəyişir, informasiya texnologiyaları həyatımıza təsir göstərir. Siyasi idarələrdə dəyişikliklərin olmasına baxmayaraq, Jirinovski kimi siyasətçilər dəyişmir. Bütün bunlara görə də Rusiyanın siyasi meydanında köhnə təfəkkürlü insanların yenilənməsinə ehtiyac var. Bu tip şəxslər şovinist maraqlardan, mühafizəkar dəyərlərdən çıxış edirlər. Onların çıxışları isə ikitərəfli münasibətlərə təsir edir.
Rusiya-Azərbaycan münasibətlərinə mənfi təsir göstərməyə hesablanan bu çıxış qəbuledilməzdir. Jirinovski öz çıxışı ilə bağlı üzr istəməli, dedikləri fikirləri təkzib etməlidir. Azərbaycan müstəqil siyasət yürüdür. Bu tip çıxışlar nəinki Cənubi Qafqaz dövlətləri arasında nifaq salmağa hesablanıb, həm də Rusiyanın bölgədə olan maraqlarını da zəiflədir. Rusiya dövləti Jirinovski ilə bağlı tədbir görməlidir. Əks təqdirdə Rusiya-Azərbaycan münasibətlərinə kölgə salan bu cür çıxışlar artacaq".
Aytəkin Cəlali
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş