"Baku Electronics"dən ŞİKAYƏT: "Artıq 100 AZN-dən çox..."

"Baku Electronics" mağazalar şəbəkəsi ilə bağlı şikayətlər var.

Sonxeber.az-ın verdiyi məlumata görə, Rəhman Şərifov adlı müştəri "Baku Electronics" mağazasından onlayn şəkildə kondisoner sifariş edib.

Şikayətçinin sözlərinə görə, 7 iyul tarixində məhsulu gətirən kuryer "BirKart"la ödəniş zamanı məbləği 18 aya bölmədən birdəfəlik çıxıb:

"Artıq 3-cü aydır ki, məsələ öz həllini tapmayıb. Mən bununla bağlı onların "Azadlıq" filialında oldum, həm də 5 dəfə. Hər dəfəsində isə mənə bir tarix deyildi. Artıq 100 AZN-dən çox faiz borcu yaranıb.

Mənim əlimdə sənədim də var ki, orada "18 aya bölünəcək" deyə qeyd edilib və özlərinin möhürü da üzərində öz əksini tapıb".

Digər şikayətçi isə mağazanın çağrı mərkəzindən narazıdır:

"9 noyabr 2020-ci ildə "Braun" firmasının "S3" model üzqırxan maşınını almışam. Aparatın başlıqları artıq xarab olub. Mağazaya getdim, məni Əhmədlidəki servislərinə yönəltdilər. Orada isə dedilər ki, o məhsula biz baxmırıq və məni "İntegral servis"ə göndərdilər. "İntegral servis"də isə o məhsulun onlarda olmadığını dedilər. 143-ə zəng etdim, 3-cü bölməni (servis bölməsini) seçdim və 1-ci zəngi qəbul edən xanım sözümü yarıda kəsərək telefonu gözləmə rejminə qoydu. 2-ci dəfə zəng edəndə isə digər operator mənə bir nömrə verdi. O nömrədən isə onlarda elə məhsulun olmadığını dedilər. Nəhayət, 3-cü dəfə məni yenidən "İntegral servis"ə yönləndirdilər. Maraqlı olan odur ki, məhsulu satan mağaza niyə ehtiyat hissələrini satmır və müştərini başqa servisə yönləndirir?! Bir sözlə, mağazanın çağrı mərkəzi bərbad rejimdə işləyir".

"Baku Electronics" mağazalar şəbəkəsinin 143 qaynar xəttinə müraciət etsək də suallarımızı cavablandıran olmayıb.

Qarşı tərəfin mövqeyini dərc etməyə hazırıq.

Aysel Səfərzadə

Telegramda izləyin