"103" və BNA qaynar xətlərə niyə cavab vermir? - SƏBƏB və TƏKLİFLƏR
Artıq elan etmişik ki, deputat Rüfət Quliyevlə "Deputatla jurnalist araşdırması" layihəsinə başlamışıq. Layihə çərçivəsində müxtəlif sosial problemlərin kökü araşdırılıb tapılır və həlli istiqamətində araşdırılma aparılıb, məqbul təkliflər irəli sürülür. İlk araşdırmamız çağrı mərkəzlərinə cavab verilməsi ilə bağlı oldu.
Xəbər verdiyimiz kimi, keçən həftə insanların ən çox müraciət etdiyi dövlət qurumlarının qaynar xəttinə cavab verilib-verilməməsini yoxlamaq üçün onların hər birinə zəng vurduq. Təkrar olaraq, zəngimizə cavab verməyən qurumları təqdim edirik:
1. Təcili Tibbi Yardım – 103
2. Bakı Nəqliyyat Agentliyi – 141, 012-404-41-20
3. TƏBİB – 1542
4. Azərsu - 955
5. XİN – 012-596-90-00
Tənqid məsələni qabartsa da, problem üçün həll yolu deyil. Bu gün Təcili Tibbi Yardım və Bakı Nəqliyyat Agentliyinin niyə qaynar xətlərə cavab verməməsini araşdırdıq.
Təcili Tibbi Yardımın çağrı mərkəzi niyə vaxtında cavab vermir?
Deputat Rüfət Quliyev "103" çağrı mərkəzinin niyə zənglərə cavab verməməsi ilə bağlı Rauf Nağıyevlə əlaqə saxlayıb. Rauf Nağıyev bildirib ki, texniki və kadr çatışmazlığı səbəbindən qaynar xəttə gec cavab verilir və yaxud da zənglər bəzən heç cavablandırılmır:
"Problemlərdən biri odur ki, telefonlar 2007-ci ildən quraşdırılan telefonlardır. İndi isə zənglərin sayı daha da artıb və köhnə telefonların gücü çatmır. Bu isə ona görədir ki, hər gün1502 zəng əvəzinə 15 min zəng olunur. Eyni zamanda, Təcili Tibbi Yardımın istifadəsində 139 maşın var. Onlardan isə texniki səbəblərə görə maksimum 110-120-si istifadə olunur".
Bununla bağlı, jurnalist olaraq, bizim və Rüfət Quliyevin təklifi odur ki, Təcili Tibbi Yardımın qaynar xətti ayrılsın. Hazırda pandemiya dövrüdür və "103" daha çox istifadə olunan və bilinən olduğu üçün sırf "COVID-19" xəstələrinin müraciətinə baxsın. Digər xəstələr üçün isə əlavə bir qaynar xətt yaradılsın.
Bakı Nəqliyyat Agentliyi niyə zənglərə cavab vermir?
Bu məsələ ilə bağlı isə qurumun mətbuat katibi Mais Ağayev bildirib ki, zənglərin sayının çoxluğundan bəzi vaxtlar yubanmalar ola bilir:
"Axşam pik saatlarda və gündüzlər zəng sayı çox olduğundan yubanmalar olur. Hazırda bizdə çağrı mərkəzinin işinin təkmilləşdirilməsi ilə bağlı tədbirlər həyata keçirilir. Operatorların sayının artırılması və fəaliyyətimizin daha səmərəli təşkili üçün işlər görülür".
Qeyd edək ki, BNA-dan daxil olan şikayətlərə görə bəzi vaxtlar ümumiyyətlə oranın qaynar xətlərinə düşmək olmur.
Bu problemlərin hər biri və onlarla bağlı təkliflər deputat Rüfət Quliyev tərəfindən Milli Məclisdə müzakirəyə çıxarılacaq və ümid edirik ki, "Deputatla jurnalist araşdırması" layihəsi çərçivəsində bütün sosial problemlərin həlli üçün ciddi addımlar atılacaq. Bizim məqsədimiz tək tənqid etmək deyil, problemin kökünü tapıb həllinə nail olmaqdır.
Aytəkin CƏLALİ
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş