Özünü güzgüdə tanımadı - 42 kilo arıqladı - FOTO

Böyük Britaniya sakini, 48 yaşlı Skott Ross güzgüdə tanınmaz hala düşdüyünü görərək, öz əksini bəyənməyib və arıqlamaq qərarına gəlib. Bir ilə o, 42 kiloqram çəkidən azad olub.

Sonxeber.az BiG.AZ-a istinadən xəbər verir ki, bu barədə "Daily Mail" yazır.

Belə ki, 2018-ci ildə o, şəxsi turistik agentliyi yaradaraq evdən işləməyə başlayıb. Gün ərzində 14 saat masa arxasında keçirən Ross daha çox hazır və zərərli yeməklərlə qidalanıb: çips, sendviç, peçenye və s.

Bir il sonra övladlarıyla qayıq sürməyə gedəndə cəmi 5 dəqiqəyə təngnəfəs olan Skott artıq çəki yığdığını anlayıb.

Evə qayıdanda güzgüyə baxıb, arıqlamaq vaxtının gəldiyini düşünən kişinin çəkisi həmin zaman 124 kiloqramdan çox olub.

Üç ay idman zalında məşqdən sonra Ross artıq xeyli arıqlayıb və bədənini formaya sala bilib, lakin dayanmaq fikrində olmayıb və daha 9 ay sonra onun çəkisi 82 kiloqrama düşüb.

Hazırda Skott zərərli qidalardan tamamilə imtina edib. Onun rasionuna zülallar, kinoa, qəhvəyi düyü, avokado və zeytun yağı daxildir.

İlk zamanlar sağlam qidaya keçmək asan olmasa da, zamanla Ross bu həyat tərzinə alışıb.

"Yeni həyat tərzinə alışdıqdan sonra, arada pizza yeyə bilərsiniz, mənim etdiyim kimi", - deyə o, təcrübəsi ilə bölüşüb.

İdman və sağlam qidalanma Rossun ruh halına da təsir edib. Hazırda özünəinamı artan kişi streslə daha rahat mübarizə aparır.

2020-ci ilin əvvəlində o, eyni problemləri yaşayan insanlara yardım etmək üçün fitnes-məşqçi kimi fəaliyyət göstərməyə başlayıb.

Telegramda izləyin