"Squid Game"dəki qanqster Rusiyada televizor satıbmış - Rus dilində danışır - FOTO

"Netflix" istehsalı olan və qısa zamanda dünyanı fəth edən "Squid Game" filmində Çan Dok Su adlı cinayətkarı (101-ci oyunçunu) oynayan Ho Son-txe (Heo Sung-tae) vaxtilə Rusiyada televizor satıb.

Sonxeber.az BiG.AZ-a istinadən xəbər verir ki, o, rus dilində təmiz danışa bilir.

1976-cı ildə Cənubi Koreyanın Busan şəhərində dünyaya gələn aktyor universitetdə rus dili fakültəsini bitirdikdən sonra "LG" şirkətində işə düzəlib.

Rus dilini mükəmməl şəkildə öyrənən Son-txe Rusiyada televizor satışı ilə məşğul olub.

Özünün dediyinə görə, o, Moskvanın bir çox otellərində televizor quraşdırıb.

Bir müddət sonra Ho "LG" şirkətindən gəmiçiliklə məşğul olan digər şirkətə keçib.

İzləyicilərdən birinin "Siz həqiqətən də rusca danışa bilirsinizmi?" sualına aktyor "Bəli" cavabını verib.

Son-txe 2011-ci ildən filmlərdə rol alır, lakin yalnız 2016-cı ildə "Məxfi agent" filmindən sonra tanınmağa başlayıb.

"Squid Game" filmindəki Çan Dok Su rolu isə onu bütün dünyada məşhurlaşdırıb.

Hazırda onun "İnstagram"da 2 milyondan çox izləyicisi var.

Qeyd edək ki, rejissor Hvan Don Hökun yaşamaq uğrunda mübarizə ilə bağlı çəkdiyi "Squid Game" adlı ekran əsəri "Netflix" platforması tarixinin ən populyar serialı olub. Premyerasından 25 gün sonra serial 111 milyon baxış sayı toplayıb. Bu o deməkdir ki, "Squid Game" ilk dörd həftədə 82 milyon baxış toplayan ABŞ-ın "Bridgertons" serialını keçib. Serial, Azərbaycan daxil, dünyanın 90 ölkəsində ən populyar serial hesab olunur.

9 hissədən ibarət bu film maddi çətinliklərini həll etmək üçün adaya yollanan və sağ qalma oyunlarına qatılan personajlardan bəhs edir. Onlar 40 milyon dollar qazanmaq üçün uşaqlıqda oynadıqları altı oyunu uğurla başa vurmalıdırlar. Rəqabətə tab gətirməyib uduzanlar isə həlak olurlar.

Telegramda izləyin