Başqalarına fayda verməyin faydası

Bu həyatda hər kəs bir məqsəd, amal uğrunda mübarizə aparır. İnsanlar bu baxımdan ikiyə ayrılırlar: sadəcə özü üçün - öz arzuları, xəyalları, istəkləri üçün yaşayanlar və digərlərinin xoşbəxtliyini də öz arzusu edənlər, ətrafını, digər canlıları da önəmsəyən, onlar üçün faydalı olmağa çalışanlar.

Bəs sən hansından olmağa qərar vermisən?

Özün üçün yaşamaq, başqalarını görməzdən gəlmək çox asandır. Sadəcə kimsəyə baxmadan, başını aşağı sallayıb, öz işinlə məşğul olursan. Digərində isə fərqindəlik yaratmağa çalışırsan.

Özüm üçün yaşayıram, amma bunun sonu hara gedib çıxacaq? Ancaq özüm, mən, yenə mən...

Bir müddətdən sonra o "aydınlanma"nı yaşayıb başlayırsan ətrafını da görməyə. Fərqli həyatlar, əzab çəkən insanlar, heyvanlar və s. Sən əgər bütün gün öz kefində, xoşbəxtliyində olmağa davam etsən, həmin əzab çəkənlərin dərdləri azalmayacaq. Amma o xoşbəxtliyindən bir az zaman ayırıb digərlərini də görsən... Bəli,o zaman nələrsə dəyişə bilər.

Təbii ki, bunu etməyə məcbur deyilsən, amma yaşama, kainata, Allaha - o Böyük qüvvəni necə adlandırmağından asılı olmayaraq, Ona borclusan. Çünki kainat biri əzab çəkib, digəri xoşbəxt olarkən tam ola bilmir. Çünki onun dərdi mənim dərdimdir. Mən sənəm, sən də mənsən... Boşuna deməyiblər, "əl əli yuyar, əl də üzü". Ətraf güzgü kimidir, etdiyin hər şey kimi, saçdığın işıq gec-tez sənə geri qayıdacaq və bir gün sənin də başqalarına ehtiyacın olduqda, əlindən tuta biləcək birinin yanında olması üçün əl tutmağı bacarmalısan. Deyə bilərsən ki, tək səninlə dünya düzəlmir, amma SƏNin dünyan elə SƏNdən başlayır.../BiG.AZ

Telegramda izləyin

instagramda izləyin