AQTA qənd məhsullarında uyğunsuzluq aşkarladı: İstehlakçılar necə seçim etməlidir? - QİDA EKSPERTİNDƏN AÇIQLAMA

Qənd alarkən yalnız məhsulun qiymətinə, rənginə və qablaşdırılmasına deyil, onun keyfiyyətinə və təhlükəsizliyinə də diqqət yetirmək vacibdir. Azərbaycan Qida Təhlükəsizliyi Agentliyi "№1", "Kəhrəba" və "Nabat" əmtəə nişanlı qənd məhsullarında kükürd dioksidin miqdarının normadan artıq olduğunu açıqlayıb. Qurumun 24 sentyabr tarixli məlumatına əsasən, uyğunsuzluq aşkarlanan məhsullarla bağlı qanunvericiliyə uyğun tədbirlər görülüb, istehsal müəssisəsinin fəaliyyəti isə məhdudlaşdırılıb.

Bəs istehlakçılar qənd alarkən hansı məqamlara diqqət yetirməlidirlər? Məhsulun üzərindəki etiket və istehsal məlumatları onun təhlükəsizliyi barədə nə deyir? Keyfiyyətsiz və normativ tələblərə uyğun olmayan qənd məhsullarından qorunmaq üçün nələrə fikir vermək lazımdır?
Mövzu ilə bağlı qida eksperti Fərid Səfərov Sonxeber.az-a açıqlamasında bildirdi ki, qənd alarkən istehlakçılar ilk növbədə məhsulun qablaşdırılmasına, etiket məlumatlarına, istehsalçıya və son istifadə tarixinə diqqət yetirməlidirlər. Onun sözlərinə görə, qənd gündəlik istifadə etdiyimiz məhsullardan biri olsa da, onun təhlükəsizliyi yalnız görünüşünə və rənginə əsasən müəyyən edilə bilməz: "İlk növbədə, məhsulun üzərində istehsalçının adı, istehsal tarixi, yararlılıq müddəti və digər zəruri məlumatların göstərilməsinə diqqət yetirilməlidir. Qablaşdırma bütöv, təmiz və zədələnməmiş olmalıdır. Qəndin açıq şəkildə, mənşəyi və saxlanma şəraiti məlum olmadan satılması isə əlavə risklər yarada bilər. Məhsul rütubətdən, kənar qoxulardan və çirklənmədən qorunan şəraitdə saxlanılmalıdır.

AQTA-nın bəzi qənd məhsullarında kükürd dioksidin normadan artıq olduğunu açıqlaması onu göstərir ki, qida təhlükəsizliyində yalnız istehlakçının vizual yoxlaması kifayət etmir. Kükürd dioksid qida sənayesində müəyyən məqsədlərlə istifadə edilən maddədir və normativ tələblərə uyğun miqdarda olduqda istifadəsinə icazə verilə bilər. Lakin onun miqdarının normadan artıq olması sağlamlıq baxımından risk yarada bilər. Xüsusilə sulfitlərə həssaslığı olan insanlarda mənfi reaksiyalar baş verə bilər.

Digər vacib məqam odur ki, qəndin ağ, sarımtıl və ya kəhrəba rəngində olması onun təhlükəsizliyini müəyyən etmir. Eyni zamanda, qəndin dadına, qoxusuna və görünüşünə baxmaqla tərkibindəki kükürd dioksidin miqdarını müəyyən etmək mümkün deyil. Bunun üçün laborator müayinələr aparılmalıdır.

İstehlakçılar AQTA tərəfindən yayılan rəsmi məlumatları və satışdan çıxarılması tövsiyə edilən məhsulların siyahısını da izləməlidirlər. Əgər alınan məhsulun konkret əmtəə nişanı, istehsal partiyası və ya digər məlumatları rəsmi xəbərdarlıqda göstərilibsə, həmin məhsuldan istifadə edilməməli və müvafiq qurumun tövsiyələrinə əməl olunmalıdır.

Nəticə etibarilə, qənd alarkən etibarlı satış məntəqələrinə üstünlük vermək, etiket məlumatlarını yoxlamaq və şübhəli məhsullardan uzaq durmaq vacibdir. Bununla yanaşı, qida təhlükəsizliyinin tam təmin edilməsi yalnız istehlakçının diqqətindən deyil, istehsalçıların məsuliyyətindən, laborator nəzarətdən və dövlət qurumlarının effektiv yoxlamalarından da asılıdır.

Sağlam qidalanaraq sağlam yaşayın!".

Müəllif: İlkin Məmmədkərimov

Telegramda izləyin