"Qulağını kəsib, sümüklərini sındırıb, yandırıb, elə meşədə..."-25 yaşlı gəncin anasından ürəkdağlayan sözlər

Xəbər verdiyimiz kimi, Samux rayonunun Füzuli kəndində 25 yaşlı Mirzaman Əliyevə bir neçə nəfər ağır xəsarətlər yetirib. Bəzi məlumatlara görə, onu Şəhid bulağını təhqir etdiyi üçün döyülüb.

Lakin onun anası Sonxeber.az-a açıqlamasında bu iddiaları təkzib edib.

Sevil Əliyeva saytlarda yazılan xəbərlərin tamamilə yanlış olduğunu deyir:

"Mən Mirzamanın anasıyam. Vallah, billah, mənim oğlum Şəhid bulağını təhqir eləməyib.

Onlar əvvəl hamısı dost idilər. Sonra nəsə oldu, araları dəydi. Artıq dostluq etmirdilər.

Dünən gecə, saat 22:00-23:00 radələrində gəlib evdən çağırdılar, birlikdə tanışlarının ad gününə getməyi təklif etdilər. Balamı maşına basıb, meşəyə aparıb zülm ediblər. Qulağını kəsib, sümüklərini sındırıb, yandırıb, elə meşədə atıb, qaçıblar. 2 saata yaxın balam orada qalıb.

Özünə gəldikdə sürünə-sürünə gedib, yaxınlıqdakı evin qapısını döyərək kömək istəyib.

Oğlumu döyən 4 nəfər Şəhid bulağı məsələsini yayır ki, onlara bəraət qazandırsınlar.

Oğlumun vəziyyəti ağırdır. 5 gün vaxt veriblər ki, təcili əməliyyat olunsun. Əməliyyatın qiyməti 4 min manatdır.

Mirzaman özü nə deyibsə, doğru olan odur".

10:13
Daha öncə yayılan xəbərə görə, Samux rayon Kolayır kənd sakini, 25 yaşlı M.Əliyev bir neçə nəfər tərəfindən yaşadığı kənddən Sünnülər kəndinin ərazisinə aparılıb. Orada gənci döyən şəxslər onun qulağının birinin yarıdan çox hissəsini kəsiblər.

Baş və üz nahiyəsindən ağır zərbələr alan gənc tanınmaz hala düşüb. O, daha sonra hadisə olan yerdən sürünə-sürünə kənd sakinlərindən birinin evinin qarşısına gəlib və kömək istəyib.

Məsələ ilə bağlı dərhal polisə və təcili tibbi yardıma məlumat verilib, ağır xəsarətlər alan gənc Gəncə şəhər Təxirəsalınmaz Təcili Tibbi Yardım Xəstəxanasına çatdırılıb. Onun qulağı tikilib, digər tibbi yardımlar göstərilib. Hazırda xəstəxanada müalicəsi davam etdirilir.

Hadisənin baş vermə səbəbləri hələ ki məlum olmasa da, özünün dediyinə görə, 6 nəfər tərəfindən döyülüb.

Faktla bağlı Samux rayon Polis Şöbəsində araşdırmalara başlanılıb.
ZAİRA AKİFQIZI

Telegramda izləyin