"Meymun çiçəyi" Azərbaycana çata bilər? - AÇIQLAMA

Xəbər verdiyimiz kimi, İngiltərədə "meymun çiçəyi" adlanan yeni virus aşkarlanıb. Bəs bu virusun əlamətləri nədir? Azərbaycanda yayılma təhlükəsi varmı?

Məsələ ilə bağlı Sonxeber.az-a infeksionist Vüqar Cavadzadə açıqlama verib.

O bildirib ki, bu virus ilk dəfə 1958-ci ildə xəstə meymunlarda aşkarlanıb:

"Yəni bu xəstəliyin infeksiya mənbəyi meymunlardır. Amma virus meymunlardan insanlara keçə bilir. Yayılması isə hava-damcı yolları ilə baş verir.

"Meymun çiçəyi" xəstəliyi tək-tək rast gəlinən bir xəstəlik olduğu üçün pandemiyaya çevrilmə ehtimalı yoxdur. Lakin xəstəlik artdıqca epidemiyalar müşahidə oluna bilər.

"Meymun çiçəyi"ndə ölüm faizi ədəbiyyat məlumatlarına əsasən 1-10%-dir.

Bu virusa yoluxmuş insanlarda ümumi əlamətlər təqribən iki həftədən sonra üzə çıxır. Bu əlamətlərə bədən hərarətinin qalxması, əzginlik, zəiflik, halsızlıq, əzələ-sümük ağrıları daxildir. Daha sonra isə bütün bədəndə səpkilər yaranmağa başlayır.

Səpkilər əvvəl ləkəli şəkildə olur. Sonra isə "papula", "vezikula"ya çevrilir və sonda səpgilər irinləyir. İrinləmə vaxtı xəstənin vəziyyəti ağırlaşa bilər, çünki bu zaman xəstənin hərarəti yüksəlir, kəskin intoksikasiya əlamətləri olur. Hətta ağır hallarda xəstələrdə infeksion toksiki şok da baş verə bilər. Xəstə sağaldıqdan sonra dəridə ömürlük çapıqlar qalır.

"Meymun çiçəyi" virus olduğu üçün müalicəsində ona təsir edən konkret antiviral preparat mövcud deyil. Müalicəsi patogenetik və
simptomatik aparılır. Xəstə ilə kontaktda olmuş şəxslər 17 gün təcrid etməlidir. Xəstəliyin qarşısını almaq üçün ümumi profilaktik tədbirlər və vaksinasiya aparıılmalıdır.

"Meymun çiçəyi"nə yaxın bir xəstəlik də təbii çiçəkdir. Təbii çiçəyə qarşı vaksinasiya olunan şəxslər "meymun çiçəyi"nə qarşı da qorunmuş olurlar.

Meymun çiçəyinin bizim ölkəyə çatma məsələsinə gəldikdə isə, ümumiyyətlə, infeksiyalar sərhəd tanımır. İnsanların ölkələrə qarşılıqlı səfərləri infeksiyanın daşınmasına, digər şəxslərin yoluxmasına səbəb ola bilər".

ZAİRA AKİFQIZI

Telegramda izləyin