Orta məktəb müəllimi və FHN əməkdaşı dünya çempionu oldular - FOTO - VİDEO

İstanbulda keçirilən Kyokuşinkaykan Karate və Ciyutaido idman növü üzrə dünya çempionatlarında uğurla çıxış edən Azərbaycan milli komandasının üzvləri iyulun 17-də Vətənə qayıdıblar.

Sonxeber.az xəbər verir ki, Heydər Əliyev adına Beynəlxlaq Hava Limanında idmançılarımız üçün təntənəli qarşılama mərasimi təşkil olunub.

Tədbirdə Azərbaycan Kyokuşinkaykan Karate Federasiyasının, "Ciyutaido Azərbaycan" Təşkilatının rəsmiləri, idmançıların yaxınları və idman ictimaiyyətinin nümayəndələri iştirak ediblər.

+85 kg çəki dərəcəsi üzrə yarışda iştirak edən Abşeron rayonu, Masazır kənd 4 nömrəli tam orta məktəbin "Fiziki-tərbiyə" fənninin müəllimi Faiq Xosroflu, -75 kg çəki üzrə isə Fövqəladə Hallar Nazirliyinin Şirvan Dövlət Yanğından Mühafizə Dəstəsinin əməkdaşı, çavuş İskəndər Həsənov qarşılaşdıqları bütün rəqiblərini məğlub edərək fəxri kürsünün ən yüksək pilləsinə yiyələnib, qızıl medala sahib olublar. İdmançılarımız öz qələbələrini Ali Baş Komandan İlham Əliyevin rəhbərliyi ilə 44 günlük Vətən müharibəsində möhtəşəm qələbə qazanan və ərazi bütövlüyümüz uğrunda canlarından keçən şəhidlərimizə həsr etdiklərini söyləyiblər.

Qeyd edək ki, ümumilikdə Azərbaycan idmançıları kyokuşinkaykan karate üzrə dünya çempionatında 2 qızıl, 3 gümüş və 3 bürünc medal qazanıblar. Ciyutaido üzrə dünya çempionatını isə təmsilçilərimiz 4 qızıl, 1 gümüş və 3 bürünc medalla başa vurublar.

İdmançılarımızın dünya çempionatlarındakı uğurlu çıxışını yüksək qiymətləndirən Azərbaycan Kyokuşinkaykan Karate Federasiyasının prezidenti Teyyub Əzizov bildirib ki, Azərbaycan ümumi komanda hesabında üçüncü olub:

"Qazanılan nailiyyət münasibətilə idmançılarımızı təbrik edirəm. Ümid edirəm ki, növbəti yarışlarda da idmançılarımız rəqiblərini məğlub edərək əldə edəcəkləri qələbələri ilə xalqımızı sevindirəcəklər. Bir həftə əvvəl millimiz Bolqarıstanda təşkil olunan Avropa çempionatında da uğurla iştirak edərək 2 gümüş və 2 bürünc medala sahib olub".

Telegramda izləyin