Deputatdan SƏRT REAKSİYA: "Nə edək, Şahruddini GÜLLƏLƏYƏK?!"

Dünən UEFA Çempionlar Liqasının pley-off mərhələsinin cavab matçında "Qarabağ" (Azərbaycan) "Viktoriya" (Çexiya) komandasına 2-1 hesabı ilə uduzaraq Çempionlar Liqasından kənarlaşıb. "Qarabağ" artıq Avropa Liqasının qrup mərhələsində mübarizəsini davam etdirəcək.

Məğlubiyyətdən sonra sosial şəbəkələrdə sərt etiraz dalğası yaranıb. Hədəf isə "köhlən atlar"ın qapısına vurulan ilk qol epizodunda çıxışda səhvə yol verən Şahruddin Məhəmmədəliyevdir. Təhqirlər, tənqidlər havada uçuşur, Şahruddinin komandadan kənarlaşması üçün petisiya yaradanlar belə var.

Məsələ ilə bağlı News24.az "Qarabağ" klubunun sabiq prezidenti, millət vəkili Aqil Abbasla həmsöhbət olub.

O, açıqlamasında bildirib ki, Şahruddin Məhəmmədəliyevi sərt tənqid edənlər "Qarabağ"ı sevməyən adamlardır: "Qarabağ möhtəşəm oyun sərgilədi, axıra qədər döyüşdü. Lakin bu, futboldur, hər şey ola bilər. 2014-cü il futbol üzrə Dünya Çempionatının yarımfinal matçında Braziliya öz meydanında Almaniyaya 1:7 hesabı ilə məğlub olmuşdu. Tək Şahruddin yox, hər kəs səhv edə bilər. Fərq ondadır ki, bizim səhvlərimizi öz yaxınlarımız, futbolçuların səhvlərini isə hər kəs görür. Şahruddinin linçlənməsinin qəti əleyhinəyəm. Qurban Qurbanov da futbolçusunu mətbuat konfransında çox gözəl müdafiə etdi.

1994-cü ilin Dünya Çempionatında 35-ci dəqiqədə Andres Eskobarın öz qapısına vurduğu qol bir neçə gün sonra onun azarkeşlər tərəfindən güllələnib, öldürülməsi ilə nəticələnmişdi. Biz bəyəm Kolumbiyayıq?! Nə edək, Şahruddini güllələyək?! Uşaq yıxıla-yıxıla böyüyür. Futbolçu da səhv edə-edə inkişaf edir. Şahruddin gözəl qapıçıdır. Dünən Kadi da zəif oynadı, indi onu da linçləməliyik? Oyun alınmadı, məsələ budur".

Telegramda izləyin