Biletləri 20 saata satılıb rekord qıran Orxan Zeynallı yeni trekinin müjdəsini verdi - FOTO

Xəbər verdiyimiz kimi, 6 il fasilədən sonra ABŞ-dan qayıdan və səhnəyə çıxmağa hazırlaşan reper Orxan Zeynallının konsert biletləri 20 saat ərzində satılaraq Azərbaycan tarixində rekord qırıb.

"Biletləri ən sürətli satılan konsert" ünvanını alan "40-cı paralel"in ikinci günü də əlavə olunub. 20 noyabrın səhəri günü – yəni, 21 noyabrda da Orxan eyni konsert proqramı ilə "Elektra Events Hall"da səhnəyə çıxacaq. İlk günə satılan 3100 biletdən sonra, 21 üçün satılan biletlər "İticket" platformasında aktivdir.

Keçmiş "HOST" qrupunun "AİD" ləqəbli üzvü satış rekordunun ardınca bu gün, 23:00-da İTV kanalında yayımlanan "Şənbə axşamı" verilişində qonaq olacaq.

BİG.AZ-ın məlumatına görə, bu barədə reperin özü şəxsi "İnstagram" səhifəsində xəbər verib.

Orxan paylaşımında pərəstişkarlarına yeni trek müjdəsini də verib:

"Şənbə günü 23:00-da İTV kanalında bizi izləməyi unutmayın. Maraqlı söhbətdən əlavə, "Yaraşır" adlı yeni mahnımız ilk dəfə səslənəcək".

Qeyd edək ki, O.Zeynallı musiqi fəaliyyətinə 2007-ci ildə başlayıb. HOST-un tərkibində 5 il ərzində 100-lərlə mahnının, 50-dən çox konsert və çıxışların həyata keçməsində fəal şəkildə iştirak edib. Qrup üzvləri 2012-ci ildən etibarən solo fəaliyyətə başlayıb. Orxanın ilk solo albomu "Biz İnsan Deyilik" adlanıb və 2010-cu ildə ilk dəfə olaraq görüşlər vasitəsi ilə satılıb.

O, "Hekayəm", "40-cı paralel", "Mavi qızılgüllər", "Karusel", "Yadımda deyilsən", "Bəlkə də nə vaxtsa" kimi hitlərin müəllifidir.

Telegramda izləyin