Qar yemək olarmı? - ARAŞDIRMA

Uzun müddət sonra Bakıya yağan qar sakinlərin sevincinə səbəb olub. Bir çoxlarımız uşaqlıqdan qarı sevirik. Bəziləri hətta "ilk qardan yemək lazımdır" deyib onun dadına da baxırlar. Qarın ağlığı xüsusən uşaqları cəlb edərək onu dadmağa "vəsvəsə edir".

Bəzi yerlərdə qarı əridib su kimi istifadə edirlər.

Bəs, görəsən. qar yemək olarmı? Bunun nə kimi fayda, yaxud zərərləri ola bilər?

BiG.AZ mövzuyla bağlı kiçik araşdırma aparıb.

Bir çox həkimlər qar yeməyin əleyhinədirlər.

Həkim-fitoterapevt, apiterapevt, bitkilər üzrə elmi işçi Elnur Eldaroğlu sualımızın cavabında qeyd edib ki, xüsusən boğazı həssas olanlar soyuqlaya, angina ola bilərlər.

Lakin bu, mövcud risklərdən cəmi biridir.

Müasir ekoloji vəziyyət bütün dünyada son dərəcə əlverişsizdir. Qar yeməklə siz ciddi xəstəliklərə tutula bilərsiniz.

Qar, tozu özünə tez çəkir. Sənaye müəssisələrin çox olduğu şəhərlərdə havadakı zərərli kimyəvi birləşmələr də qara daha tez hopur.

Digər tərəfdən, qar üzərində gəzən insan və heyvanları, avtomobilləri də nəzərə almaq lazımdır. Belə halda qarın təmiz qalması mümkünsüzdür. Xüsusən sarı rəngdə olan qarı yemək təhlükəlidir. Heyvanların nəcasətindən başqa, maşın yağı, qum və kimyəvi maddələr da qara bu rəngi verə bilər.

2015-ci ildə aparılan araşdırmanın nəticələrinə əsasən, hətta yerə təzə düşən qarın da avtomobil qazı ehtiva edir.

Hətta böyük şəhərlərdən uzaq olan ucqar yerlərdə belə, qarın tərkibində böyük miqdarda kömür tozu və havanı çirkləndirən maddələr mövcuddur. Alimlər hesab edirlər ki, qar yerə düşmədən öncə də insan orqanizminə zərərlidir.

Buna baxmayaraq, qardaş Türkiyədə "qar halvası" hazırlayıb yeyənlər var. Bəzilərinin sözlərinə görə, qara doşab əlavə etməklə hazırlanan bu "halva" maddələr mübadiləsini sürətləndirir.

Telegramda izləyin