Ermənistan Azərbaycandan qaz ala bilərmi? – Ekspertlər şərtləri açıqladı

Ermənistanın Azərbaycan ərazilərini işğal etməsindən sonra Bakının İrəvana qaz və elektrik enerjisinin verilməsinin dayandırması Ermənistanın enerji sistemi üçün sarsıdıcı zərbə olub.

Bunu oktyabrın 26-da Tbilisidə "İpək Yolu" beynəlxalq forumu çərçivəsində Ermənistanın ərazi idarəetmə və infrastruktur nazirinin müavini Akop Vardanyan deyib. O, bunun səbəbini həmin vaxt qazı Azərbaycandan almaları ilə izah edib.

Onun sözlərindən belə məlum olub ki, Azərbaycan Ermənistan tərəfindən işğal edilmiş ərazilərini azad etdikdən sonra İrəvan Bakıdan qaz almağa hazırdır.

"Ümid edirəm, bizim regionda sülh bərqərar olacaq, biz, həmin vaxtlardakı kimi, əməkdaşlıq edə, energetika sistemlərimizi şaxələndirə biləcəyik", – nazir müavini əlavə edib.

Ermənistanın Baş naziri Nikol Paşinyan isə forumdakı çıxışında "Sülh qovşağı" təklifini də irəli sürüb. Təklifin mahiyyəti bölgə ölkələri arasında kommunikasiya yollarının açılmasıdır.

Politoloq Elxan Şahinoğlunun fikrincə, Azərbaycanın nəzəri cəhətdən Ermənistana həm qaz satması, həm də Ermənistanın da içində olduğu regional nəqliyyat layihələrində iştirakı mümkündür.

"Ancaq bunun üçün ilk növbədə Ermənistanla Azərbaycan arasında sülh sazişi imzalanmalıdır"- deyə, o əlavə edib.

Ekspertin sözlərinə görə, digər tərəfdən, "Sülh qovşağı" təklifi Ermənistan hakimiyyətinin beynəlxalq təşkilarlarda dostları ilə birgə Azərbaycan əleyhinə təbliğata son qoymasını diqtə edəcək: "Necə ola bilər ki, Ermənistan həm Azərbaycandan qaz alsın və birgə layihələrdə iştirak etsin, həm də Azərbaycana qarşı qətnamələr qəbul etdirməyə çalışsın? İkisi bir arada mümkün deyil. Paşinyan özündə cəsarət tapıb Azərbaycanla sülh sazişi imzalayarsa və Prezident İlham Əliyevin də irəli sürdüyü "Qafqaz evi" təklifi reallaşarsa İrəvan və erməni lobbisi artıq Azərbaycana qarşı çirkin təbliğat apara bilməyəcəklər. Bunun müsbət tərəfi də odur ki, müxtəlif ölkələrdəki ermənipərəst siyasi mərkəzlər, o cümlədən ABŞ Konqresi və rəsmi Paris Azərbaycana qarşı "erməni kartı"ından imtina etmək məcburiyyətində qalacaqlar".

Politoloq Ermənistanın radikal müxalifətinin Nikol Paşinyanın "Sülh qovşağı" təklifinin əleyhinə çıxmasının təsadüfi olmadığını vurğulayıb.

Neft Araşdırmaları Mərkəzinin rəhbəri İlham Şaban da hesab edir ki, iki ölkə arasında sülh müqaviləsi imzalansa, diplomatik əlaqələr bərpa olunsa, qaz saşizi mümlkündür. Ekspert xatırladır ki, 10 noyabr bəyanatında kommunikasiyaların bərpa olunması nəzərdə tutulur.

"Bu, iqtisadi əlaqələrin bərpası deməkdir, onun bir qolu da enerji ticarətidir", - iqtisadçı əlavə edib.

İ.Şaban rvurğulayıb ki, Zəngəzur enerji dəhlizi yaradılsa, Azərbaycan Qafqazın hər 3 ölkəsini əhatə etməklə istehlakçılara həm qaz, həm də elektrik enerjisini alternativ stabil xətlərlə çatdırmaq imkanı əldə edə bilər: "Gürcüstan artıq çox gözəl başa düşür, Ermənistan da başa düşməlidir ki, iqtisadi inkişaf üçün enerji ən önəmli amildir, onun stabilliyi isə ikiqat önəmlidir. Ermənistan bunu anlamasa, öz işidir, biz öz malımızı kiməsə zorla xırıd edə bilmərik".

İlham Şaban deyir ki, Ermənistan İrandan ildə təxminən 400 milyon kubmetr qaz alır: "Bu qaz daxildə pərakəndə satış üçün nəzardə tutulmayıb. Onun bir qismi elektrikə çevrilərək İrana qaytarılır, bir qismi də ölkədə qalır. Bu əməliyyat Razadan İstilik Elektirk Stansiyasında həyata keçirilir. Bu stansiyasının sahibi isə Rusiya Elektrik Şəbəkələri Şirkətidir".

Azpolitika

Telegramda izləyin

instagramda izləyin