Ermənilər strateji nöqtədə yerləşən kəndimizi necə işğal etdi? - Xain planlar belə başladı

Kərki kəndinin sakinləri 34 ildən çoxdur ki, yurd həsrəti ilə yaşayırlar. Kərki 1990-cı ilin yanvar ayında işğal edildi. 30 yanvar faciəsi ərəfəsində ermənilər Naxçıvan Muxtar Respublikasını işğal etməyə cəhd göstərdilər. 1989-cu il dekabrın 14-dən etibarən ermənilər Kərki, Sədərək kəndlərini güclü atəşə tutdular. 1990-cı ilin yanvarın 15-dən hücumlar daha da intensivləşdi. Təhlükəsizlik məqsədilə ilk növbədə qadınlar, uşaqlar və yaşlılar kənddən çıxarıldı.

Sonxeber.az xəbər verir ki, Kərki kəndinin sakinləri "Aztv Xəbər"ə açıqlama verib:

"Mənim özüm orada avtobus sürücüsü işləyirdim. Hər gün o kəndə gedib gəlirdim. Orada ermənilər bizə çox əziyyət verib. Avtobusu elə hala salmışdılar ki, darmadağın etmişdilər.

Gözəl günlərimiz keçib. Daha sonra qaçqın düşdük. Hərəmiz bir tərəfə dağıldıq".

Yanvarın 18-i səhərə kimi Kərki kəndi müdafiə olundu. Lakin silah çatışmazlığı və qüvvələr nisbəti qeyri-bərabər olduğundan kənd işğal edildi. Kərki Sədərəyin 8-10 km-liyində yerləşir. Kəndin işğalı 20-ci əsrin sonlarında ermənilərin ilk işğalçılıq aktı kimi tarixə düşdü. Eyni zamanda Kərkinin işğalı 20 yanvar qırğını, Xocalı soyqırımının və ermənilərin Azərbaycanın alınmaz qalası olan Sədərəyə hücumlarının başlanğıcı oldu.

Kərki kəndinin müdafiəçiləri qəhrəmanlıqla vuruşub. Son ana qədər düşmənə ciddi müqavimət göstəriblər. Həmin gün kənd səhər saat 4 radələrindən saat 19:00-a qədər şiddətli atəşə tutulub.

"Kənddə 11 silahımız var idi. 11 silah ilə Kərki kəndində müdafiə olunmuşuq. 2500-3000 nəfərə qarşı müqavimət göstərmişik. Hər şey soyuq qar günündə olub".

Ətraflı "Aztv Xəbər"in süjetində:

Telegramda izləyin

instagramda izləyin