32 ildən sonra simvolik qələbə: Zidan Fransa millisində ilk məşqçisinin yolunu necə təkrarladı

Deşam və Blan da daxil olmaqla, əvvəlki beş fransız məşqçisi qələbə ilə başlaya bilməyib

Zinəddin Zidan Fransa milli komandası ilə əfsanəvi tarixində yeni bir fəsil açıb. Baş məşqçi kimi debütündə 54 yaşlı mütəxəssis komandanı Türkiyə üzərində səfərdə 1-0 hesablı qələbəyə aparıb.

Yeganə qolu 54-cü dəqiqədə Kilian Mbappé vurub.

Lent.az-ın xarici mediaya istinadən məlumatına görə, bu qələbə Zidana fransız məşqçilərinin 32 ildir gözlədiyi bir uğuru təkrarlamağa imkan verib. Sonuncu dəfə yeni baş məşqçi debüt oyunun 1994-cü ilin fevralında qazanıb.

O zaman Eme Jake karyerasına İtaliya üzərində səfərdə möhtəşəm 1-0 hesablı qələbə ilə başlayıb. Neapolda Yuri Corkaeff yeganə qolu vurub. Dörd il sonra Jake Fransaya ilk Dünya çempionu titulunu qazandırıb.

Bu hekayənin xüsusi bir simvolizmi var. Həmin oyundan altı ay sonra Zidan Fransa millisində oyunçu kimi debüt edib. Otuz iki il sonra Zinəddin keçmiş müəlliminin məşqçilik uğurunu təkrarlayıb.

Onlar arasında beş baş məşqçi karyeralarına qələbə ilə başlamağa çalışıb və heç biri buna nail ola bilməyib:

• Roje Lemerr, 1998 - Avstriya, 2-2;

• Jak Santini, 2002 - Tunis, 1-1;

• Raymon Domenek, 2004 - Bosniya və Herseqovina, 1-1;

• Loran Blan, 2010 - Norveç, 1-2;

• Didye Deşam, 2012 - Uruqvay, 0-0.

Beləliklə, Jak və Zidanın qələbələri arasında fransız məşqçilər debüt oyunlarında dörd dəfə heç-heçə edib və bir dəfə məğlub olublar.

Telegramda izləyin