Qazaxıstanda daşqınlar səbəbindən 8,8 mindən çox insan təxliyə məntəqələrində qalıb

Qazaxıstanda davam edən daşqınlar səbəbindən 8,8 mindən çox insan təxliyə məntəqələrində qalıb.

"Report" xəbər verir ki, bu barədə Qazaxıstan Fövqəladə Hallar Nazirliyinin nümayəndəsi Askar Şarip bildirib.

"Ümumilikdə, təxliyə məntəqələrindən 22 734 nəfər evlərinə qayıdıb. 8 809 nəfər hələ də məntəqələrdə qalır ki, onlardan 3 828-i uşaqdır", - Nazirlik rəsmisi deyib.

Onun sözlərinə görə, Qərbi Qazaxıstan və Atırau vilayətlərində Jaiyk (Ural) çayının məcrasında suyun səviyyəsi xüsusi nəzarətdə saxlanılır və burada ikinci daşqın dalğası baş verə bilər. Bu ərazilərdə bəndlərin möhkəmləndirilməsi istiqamətində işlər aparılır.

Mülki müdafiə qüvvələri Akmola, Aktobe, Atırau, Qərbi Qazaxıstan, Kostanay və Şimali Qazaxıstan vilayətlərində zərər çəkmiş evlərdən suyun çəkilməsi işlərini davam etdirir. Xilasetmə işlərində 36 mindən çox insan, 5 min texnika, 16 təyyarə iştirak edir.

Telegramda izləyin