"Analığım qardaşımı öldürtdürdü, nəvəsi ağacla boynundan vurmuşdu" - 85 yaşlı sənətkar İLLƏR SONRA danışdı

"1940-cı ildə anadan olmuşam. 1962-64-cü illərdə A.Zeynallı adına Bakı Musiqi texnikumunda Seyid Şuşinskinin kursunu, 1977-ci ildə Azərbaycan Dövlət İncəsənət İnstitutunu bitirmişəm. Tələbə ikən "Lalə" qızlar ansamblının solisti kimi çıxış etmişəm. Atam həmişə gətirib-aparardı məni. Heç nəyim yox idi, qaloşumdan başqa.. Ceyran Haşımova bizə o qədər köməklik edib ki. Onun əziyyətlərini qətiyyən itirə bilmərəm. Həmişə də bizə nəzarət edib. Bizi özbaşına buraxmazdı.. 1964-1970-ci illərdə isə Azərbaycan Dövlət Filarmoniyasının solisti olaraq səhnəyə çıxmışam. Opera və Balet teatrında müxtəlif tamaşalarda baş rolları ifa etmişəm. "Əsli və Kərəm" operasında Əsli, "Aşıq Qərib"də Şahsənəm, "Şah İsmayıl"da Ərəbzəngi, "Gəlin qayası"nda Tutu, Əmi qızı, "Leyli və Məcnun"da Məcnunun anası rollarım dillər əzbəridir. Bilirsiniz ki, teatrda yaşlı adamları saxlamırlar. Böyük sənətkarlarla tamaşada rollar oynamışam. Tamaşamı oynayan kimi tez evə qaçırdım. Mən özümü də, sənətimi də qoruyurdum. Heç vaxt şərait yaratmamışam ki, kimsə haqqımda pis fikirləşsin. Ailəmi, övladlarımı sənətdən üstün tutmuşam. Bununla belə sənətdə də ad-san qazanmışam. Dövlətimiz, cənab prezidentimiz məni mükafatlandırıb. Hazırda "Əməkdar artist" fəxri adını daşıyıram, "Prezident Təqaüdü" alıram. Dövlətimdən çox razıyam. İlham Mirzəyev sağ olsun, bütün bunları onun "Etiraf" verilişində deyəndən sonra mənə diqqət çoxaldı. Ərdoğanın qarşısında şeirlər demişəm, məni mükafatlandırıb, medala layiq görüb. 20 min tamaşanın qarşısında Türkiyədə və bir çox türk dövlətlərində çıxışlarım olub. Uzun illərdir evdə oturmuşam, bir sənət yoldaşım məni yada salmır. Bir zəng nə olan şeydir ki? Bəlkə də heç yaşamağımdan xəbərləri yoxdur".

Ətraflı
Bunu Moderator.az-a özəl açıqlamasında əməkdar artist Raziyə Şirinova deyib.

O daha sonra həyat yoldaşı, tanınmış tarzən Rafiq Məmmədovun bu günlərdə dünyasını dəyişdiyini söyləyib:

"Rafiq ağır yataq xəstəsi idi. Ona görə nə sənətimlə məşğul ola bildim, nə də son illərdə efirlərə çıxa bildim. Mənim kimi əziyyət çəkən olmayıb. Qızlarım da, oğlum Samir də bizimlə birgə əziyyət çəkdilər. Onu yataq xəstəsi ola-ola yaşatdıq. Yoldaşım böyük sənətkarlarla çiyin-çiyinə işləyib. Xalq artisti Əhməd Bakıxanovun konsertmeystri olub. Nə qohumları gəldi, nə də ki, çiyin-çiyinə çalışdığı sənətkarlar gəlib-getdilər. Gözü yolda qaldı. O bir dəfə mənə yüksək səslə qışqırmayıb. Çox yaxşı insan idi, xasiyyəti gözəl idi. Səhnə geyimlərimi belə özü ütüləyirdi. Deyirdi ki, sən sənətkarsan, görürdü ki, çatdırmıram, özü mənə kömək edirdi. Təranə Vəlizadə, Firuzə İbadova, Gövhər Rzayeva yasa gəlmişdi".

Sənətkar bildirib ki, 5 övlad olublar və yetimçiliklə böyüyüblər:

"Biz 5 övlad yetim qalmışıq. Mənim 14 yaşım var idi. Atam da mühəndis idi. Anamın ölümündən sonra atam Kimya adında bir qadın alıb gətirdi. O bizə "analıq" edirdi. Savadsız qadının biri idi. Kimyanın da bu izdivacdan bir oğlu dünyaya gəldi. Onu da Orenburqda öldürdülər. Meyitini gətirdilər, biz onu necə təmtəraqla yola saldıq bir Allah bilir. Qardaşım da savadlı bir insan idi. Onu analığımın sifarişi ilə nəvəsi öldürdü. Səbəbi də mülk idi. Çünki bizim Gədəbəydə torpaqlarımız var idi. Mən də, qızlarım da, həyat yoldaşım da Türkiyədə idik. Zəng edib dedilər ki, ay Raziyə, qardaşın ölüb. Sapasağlam idi, dedim ki, ola bilməz ki, öz əcəli ilə ölüb. Qardaşımın meyitini bizim istəyimizlə, tələbimizlə yardılar. Gördülər ki, boyun nahiyəsindən vurublar. Novruz bayramı ərəfəsi olub. Analığı üçün ət alıb gətirib. Bu onun yaxşılığı, o da bunların vicdansızlığı! Qardaşımın ürəyinə damıbmış ki, onu öldürəcəklər... Məhəlləyə düşüb, dostuna deyib ki, deyəsən məni öldürəcəklər. Elə də olub. Kimyanın nəvəsi qardaşımdan evin sənədlərini istəyib. Qardaşım sənədləri verməyəndə böyük ağacla boyun hissəsindən vurub onu öldürüb. Halbuki gəlib nənəsinə də deyib ki, Zakiri öldürəcək. Kimya da bunu bilib. O vaxt məhkəmə oldu, istəyirdilər ört-basdır etsinlər. Amma biz imkan vermədik. O qadın da, nəvəsi də it kimi öldülər. Qadın havalanıb küçələrə düşdü. Yaşatdığını yaşamadan heç kim bu dünyadan getmir".

Telegramda izləyin