Deputatlığa namizədlər niyə təşviqatı sosial şəbəkələrdə aparırlar ? - AÇIQLAMA

2024-cü il sentyabrın 1-də Azərbaycan Respublikası Milli Məclisinin VII çağırış deputatlarının seçilməsi üçün növbədənkənar parlament seçkiləri keçiriləcək. Majoritar seçki sistemi ilə keçirilən seçkilərdə Azərbaycan Milli Məclisinin 125 deputatının seçilməsi nəzərdə tutulub. Seçki qabağı namizədlərin təşviqat seçimləri maraq doğurur. Belə ki onlar, vətəndaşlarla real görüşlər keçirməkdən daha çox sosial mediada ünsiyyətə üstünlük verirlər. Bəs görəsən buna səbəb nədir ?

Mövzu ilə bağlı Sonxeber.az- a açıqlama verən sosioloq Elçin Bayramlı bildirib ki, namizədlərin sosial şəbəkələrdə təşviqat aparmalarına səbəb sosial şəbəkələrin pulsuz olmasıdır:

"Sosial şəbəkələrdə daha ucuz və ya pulsuz təbliğat imkanları var. Əvvəllər daha baha başa gəlirdi. Müxtəlif tədbirlər, görüşlər keçirmək, plakatlar asmaq böyük xərc aparırdı. İndi sosial şəbəkələrin imkanlarından istifadə etməklə tamamilə pulsuz şəkildə təbliğatlarını qurub apara bilirlər. Bir digər səbəb isə bütün əhalinin sosial şəbəkələrdən istifadə etməsidir. Bir tədbirə 100 nəfər yığa bilirsən, amma sosial şəbəkələrdə 10 minlərlə insana çatmaq mümkündür. Bu iki səbəbdən namizədlər çalışırlar təbliğatlarını sosial şəbəkələrdə aparsınlar. Çünki həm interaktiv imkanlar var, həm birbaşa hər kəsin sual verib, cavab almaq imkanı var. Görüşlərdə bunu adətən eləmək olmur. Yüzlərlə suala cavab vermək üçün bir gün belə bəs eləməz, amma sosial şəbəkələrdə daha interaktiv şəkildə insanlarla əlaqə saxlamaq, müzakirələr aparmaq, fikirlərini çatdırmaq, çoxsaylı səhifələrdə, qruplarda, kanallarda yaymaq mümkündür və bütün bu imkanlar pulsuzdur".

O qeyd edib ki, sosial şəbəkələrdə təşviqatların aparılması namizədlər üçün sərfəli olsa da vətəndaşlar üçün mənfi haldır:

"Bunlar təbii səbəblərdir. Düzdür, bu optimal vəziyyət daha effektli olsa da real ünsiyyətdən yaxşı deyil. Əvvəllər daha yaxşı idi ki, birbaşa insanlarla görüşlər təşkil edirdilər. Kəndlərdə, qəsəbələrdə, müəissiələrdə, müxtəlif ictimai yerlərdə canlı ünsiyyət olurdu, amma indi bir növ robotlaşmış bir sistem var. Onlar heç çox vaxt bunları sosial şəbəkələrdə özləri etmir, köməkçiləri edir. Bu namizədin özü üçün bir tərəfdən rahatdır - az xərc çəkir və daha çox effekt əldə edir. Digər tərəfdənsə canlı sosial görüşlərin olmaması vətəndaşlar üçün mənfi haldır. İnsanların birbaşa ünsiyyəti, namizədlə dialoqu, canlı görüşlərinin olmaması qeyri-təbii bir haldır. Baxmayaraq ki, vətəndaşlar sosial şəbəkədə yazır, sual verə bilir, amma canlı ünsiyyət daha təbii və effektivdir. Bu cəhətlərdən baxsaq, texnologiyanınn imkanları getdikcə tək bu sahədə yox, bütün sahələrdə fəaliyyətləri də, ünsiyyətləri də elektronlaşdırır və təbii olaraq insanlar real həyatdan kənar düşür. Necə ki, əvvəllər etirazlarını aksiyalarda bildirirdilər, amma son dövrlərdə bu sosial şəbəkələrdə olur. Eyni proses bu seçki təbliğatında da gedir".

Çiçək Sadatova

Telegramda izləyin

instagramda izləyin