Məşhur aktyorun ölümü ilə bağlı 5 nəfərin həbs olunduğu təsdiqləndi

ABŞ Ədliyyə Nazirliyi amerikalı aktyor Metyu Perrinin ölümü ilə nəticələnən ketaminin həddindən artıq dozası ilə bağlı beş nəfərin həbsini təsdiqləyib. İşdə ikisi həkim olmaqla 5 nəfər təqsirləndirilir. Onların arasında Şimali Hollivuddan Jasvin Sanqha ("Ketamin Kraliçası") və Santa Monikadan Dr. Salvador Plassensia ("Dr. P") var.

Qaynarinfo xəbər verir ki, bu barədə ABŞ Ədliyyə Nazirliyinin bəyanatında deyilir.

Perrini narkotiklə təmin etməkdə və aktyora iynə vurmaqda günahını etiraf edən Perrinin şəxsi köməkçisi Kennet İvamasa da həbs edilib.

Daha əvvəl məlum olub ki, Perri depressiya və narahatlıq pozğunluğunu müalicə edən həkimlərin nəzarəti altında ketamin qəbul edib, lakin aktyorun ölümü terapiya kursuna getdikdən bir həftə yarım sonra baş verib ki, bu da maddənin qanunsuz olaraq alındığını göstərir. Üstəlik, ölüm günü bədənində tapılan doza ümumi anesteziya üçün istifadə olunan doza ilə müqayisə edilə bilər.

Perri 2023-cü il oktyabrın 28-də 54 yaşında vəfat edib. Onun ölümündən sonra aktyorun cəsədinin evində cakuzidə tapıldığı bildirilib. Los Angelesdən məhkəmə eksperti daha sonra bildirib ki, ölümün səbəbi ketaminin güclü təsiri olub.

Metyu Perri ABŞ-ın "Dostlar" serialındakı Çendler Binq rolu sayəsində geniş populyarlıq qazanıb. Perri dəfələrlə "Qızıl Qlobus" və "Emmi" kimi nüfuzlu Amerika kino mükafatlarına namizəd olub. 2022-ci ildə "Dostlar, sevilənlər və bir böyük pis şey" adlı tərcümeyi-halında aktyor uzun illər ağrıkəsici və alkoqol asılılığı ilə mübarizə apardığını və bir neçə dəfə reabilitasiya klinikalarında müalicə aldığını bildirib.

Telegramda izləyin