Xalq artistinə şillə vuran, məşhur aktrisaya görə az qala ailəsi dağılan aktyorumuz: "Türkan Şoray başıma elə oyun açdı ki..."

"Bu gün 74 yaşım tamam olur.. Gələn il yubiley doğum günümdür. Müalicələrdəyəm, vəziyyətim heç də yaxşı deyil. Dost-tanış zəng edib soruşur, təbrik edir, maraqlanır. Xəstəlikdən başım açılmır ki, sevinim.. Bu xəstəlik elədir ki, gündən-günə ağrılar şiddətlənir. Dərmanla yaşayıram. Gələn ilə sağ qalsam arzularım var. Sənətlə bağlı, nəvəmlə bağlıdır. Analizləri verəcəm, görək nə çıxır? Əvvəlki kimi yemək yemirəm. Evin içindəyəm, güc-bəla ilə gəzirəm. Evdəkilər hər zaman yanımdadır, məni tək buraxmırlar"

Bunu Moderator.az-a açıqlamasında xalq artisti Ənvər Həsənov deyib. Görkəmli aktyor bildirib ki, bütün ömrünü kino yolunda fəda edib.

"Mənim iki həyatım olub. Kino mənim şəxsi həyatımı da üstələyib. Kinoya canımı, sağlamlığımı vermişəm. Peşman da deyiləm. Bu gün dövlətim əməyimi yüksək qiymətləndirib məni hər şeylə təmin edib. Bəzən oturub o köhnə illəri yada salıram. Öz-özümə fikirləşirəm ki, görəsən bunlar mənim həyatımda baş verib?! Böyük sənətkarlarla tərəf müqabili olmağım mənim üçün unudulmaz bir hadisə olurdu. "Yeddi oğul istərəm" filmindən hazırda 3 qardaş-mən, Rafiq Əzimov və Əbdül Mahmudbəyov həyatda qalmışıq. Bütün filmlərim, rollarım mənim üçün əzizdir. Cəlalı bir başqa çox istəyirəm, Şahbazı bir başqa, Muradı da bir başqa.. "7 oğul istərəm"- də belə bir səhnə var idi ki, mən aktyor İsmayıl Osmanlıya şillə vurmalı idim.. İnanın oturub-fikirləşdim, rejissora dedim, dedi ki, bunu mütləq etməlisən. Mən də İçərişəhərdə qalırdım. Bizim məhəllədə böyüyə hörmət var idi. Bunu kinoda görsəydilər mənim özümə münasibət birmənalı olmazdı... Ona görə də bu səhnəyə çəkiləndən sonra rejissordan xahiş etdim ki, o hissəni filmdən çıxarsın. Tofiq Tağızadə güc-bəla ilə bunu filmdən çıxardı. Deyirdi ki, filmin məğzini itirirsən" deyə sənətkar bildirib.

Ənvər Həsənov Türkan Şoray, Jerar Depardye, Kadir İnanırla dostluq əlaqələrindən də danışıb.

"O illərdə Sovet filmləri həftəsi keçirilirdi. Türkiyənin məşhur sənətkarları Türkan Şoray, Kadir İnanır, Fatma Girik də festivalda iştirak edirdi. Mən də bir film ilə Sovet ölkələrində məşhur olmuşdum. İstər Türkan xanımla, istərsə də Kadir İnanırla o illərdə yaxın idik. Daha sonra Türkan Şorayla Kadir İnanır Azərbaycana gəldi. Bakıda onları mən gəzdirirdim, günümüz birlikdə xoş keçirdi. Türkan Şorayla Kadir İnanır mənə öz fotolarını imzalayıb verdilər. İndiyə qədər də mən o fotoları yadigar saxlayıram. Türkan Şoray mənə hədiyyə etdiyi şəkilə yazmışdı ki, "Ənvərə böyük sevgilərimlə". Türkan başıma elə oyun açdı ki.. (gülür). Ona görə həyat yoldaşım az qala məndən ayrılırdı, çox qısqanc qadın idi. Bu da sevgidən irəli gəlirdi. Mən həmişə demişəm, bizim sevgimiz mən öləndən sonra da yaşayacaq. Jerar Depardyeni bağımda qonaq etmişəm" deyə o bildirib.

Telegramda izləyin