Adamyuyan maşın buraxıldı

"Science" şirkəti su ilə doldurulmuş, biometrik məlumatları ölçən və insanlar üçün "yuyulma və qurutma" effekti verən bir cihaz təqdim edib.

Lent.az-ın xarici KİV-ə istinadla xəbərinə görə, Yaponiyanın "Science" şirkəti "Mirai Ningen Sentakuki" adlı inqilabi cihaz hazırlayıb ki, bu da gələcəyin insanları üçün paltaryuyan maşın kimi tərcümə olunur.

Daxili kresloya malik olan bu kabinə, eyni zamanda istifadəçinin ürək döyüntüsünü və digər biometrik göstəriciləri ölçərkən rahatlamağa kömək etmək üçün su ilə doldurulur.

Şirkətdən verilən məlumata görə, innovativ cihaz unikal istirahət təcrübəsi təmin etmək üçün hazırlanıb. Kabinə avtomatik olaraq sensor məlumatlarına əsasən suyun temperaturunu tənzimləyir və həmçinin xoş atmosfer yaratmaq üçün şəffaf qapağın içərisinə şəkil proyeksiya edir.

Cihaz gələn ilin aprelində Osakada keçiriləcək sərgidə təqdim olunacaq. Ziyarətçilər əvvəlcədən vaxt ayırmaqla stenddə 15 dəqiqəlik seansdan yararlana biləcəklər. Bununla belə, "Techcrunch"un qeyd etdiyi kimi, cihaz daha çox konsept kimi qəbul edilir və kütləvi istehsal olunmaya bilər.

Şirkət həmçinin insanlara özəl şəraitdə texnologiyadan istifadə etməyə imkan verən evdə istifadə üçün versiya yaratmaq üzərində işləyir.

"Science" ümid edir ki, onların ixtirası şəxsi rahatlıq və sağlamlıq sahəsində gələcək tendensiyaların bir hissəsi olacaq.

Telegramda izləyin