"Paşinyanın Qərbi Azərbaycan məsələsi ilə uydurma "Qərbi Ermənistan" anlayışı arasında paralel aparmaq cəhdi absurddur" - DEPUTAT

"Nikol Paşinyan sərsəm açıqlamaları ilə sülh müqaviləsi ilə bağlı danışıqların vaxtını uzatmağa və regionda vəziyyəti yenidən gərginləşdirməyə çalışır".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, bu gün Ermənistan hakimiyyəti havadarlarının sifariş əsasında addımlar atır:

"Ermənistanın baş naziri Nikol Paşinyanın Qərbi Azərbaycan məsələsi ilə uydurma "Qərbi Ermənistan" anlayışı arasında paralel aparmaq cəhdi savadsız və absurd yanaşmadı. Paşinyanın bu əsassız yanaşması qəbuledilməzdir. Ermənistan tarix boyu qonşu ölkələrə qarşı hər zaman işğalçı siyasəti yürüdür, "Qərbi Ermənistan" ifadəsi Ermənistanın Konstitusiyası və digər əsas sənədlərində, siyasi addımlarında öz əksini tapmış əsassız ərazi iddiasıdır. Qərbi Azərbaycan məsələsi isə fərqlidir. Burada söhbət etnik təmizləməyə məruz qalmış azərbaycanlıların Ermənistana dinc, təhlükəsiz və ləyaqətli şəkildə qayıdışına xidmət edən insan hüquqları Ermənistan rəhbərliyi unudur ki, bu dövlətin özü belə vaxtı ilə azərbaycanlıların sıx yaşadığı, tarixi Azərbaycan torpaqlarında qurulub".

Deputat söyləyib ki, ermənilər tarixi Azərbaycan torpaqlarına XIX əsrdə köçürülüb:

"1828-1931-ci illərdə İrandan 8249, Osmanlı dövlətindən isə 14044 erməni ailəsi, ümumilikdə 150 min nəfərdən çox erməni köçürülüb Qərbi Azərbaycan və Qarabağ ərazilərində yerləşdirilib. Sonrakı illərdə gerçəkləşən erməni köçləri hesabına bu ərazilərin etnik tərkibi süni şəkildə dəyişdirilib.1917-ci il məlumatına görə İrəvan quberniyasında 373582 nəfər azərbaycanlı yaşayırdı. 1918-ci ildə İrəvan bölgəsində erməni dövləti yaradılan zaman Ermənistan hökuməti digər öhdəliklərlə yanaşı, İrəvanda və yeni yaradılan erməni dövlətinin digər ərazilərində qalan müsəlmanların sərbəst dini ibadət, mədəniyyət, siyasi və ana dilində təhsil almaq hüquqlarını təmin etməyi öz üzərinə götürdüyü halda, bu öhdəliklərin heç birini yerinə yetirmədi. Azərbaycanlılara qarşı soyqırım və etnik təmizləmə siyasəti həyata keçirdi".

Sovet hakimiyyəti dövründə isə Moskva hökuməti tərəfindən Azərbaycan ərazilərinin böyük bir qismi xalqın iradəsinə zidd olaraq onun əlindən alınaraq Ermənistana hədiyyə edilib. Nəticədə bizim torpaqlar hesabına Ermənistanın SSR-in ərazisi 9000 kvadrat kilometrdən 29743 kvadrat kilometrə çatdırılıb.

"Sovet Ermənistanı da azərbaycanlılara münasibətdə daşnak Ermənistanının siyasətini davam etdirib. 1948-1953-cü illərdə 150 min, 1988-1991-ci illərdə 300 min nəfər azərbaycanlı dədə-baba yurdu olan Qərbi Azərbaycandan (indiki Ermənistandan) deportasiya edilib. Ona görə də bu gün Qərbi Azərbaycan məsələsi etnik təmizləməyə məruz qalmış azərbaycanlıların özlərinin bugünkü Ermənistanda qalan yurd yerlərinə, evlərinə, sülh şəraitində dinc, təhlükəsiz və ləyaqətli şəkildə qayıdışına xidmət edən insan hüquqları mövzusudur".

Deputat vurğulayıb ki, bizim insan hüquqlarına əsaslanan haqq işimizi Paşinyanın ərazi iddiası ilə müqayisə etməsi yolverilməzdir:

"Qərbi Azərbaycan İcması dəfələrlə Ermənistan hökumətinə müraciət edərək, Qərbi azərbaycanlıların qayıdışı ilə bağlı beynəlxalq hüququn norma və prinsiplərinə, o cümlədən dövlətlərin ərazi bütövlüyü və suverenliyinə tam riayət olunmaqla dialoq başlatmağı təklif edib. Amma digər məsələlərdə olduğu kimi Ermənistan rəhbərliyi danışıqlar sərsəm açıqlamaları ilə dünya ictimaiyyətinin diqqətini əsassız ərazi iddialarına yönəltməyə çalışır. Paşinyanın bu cəhdi Ermənistanın növbəti işğalçı siyasətidir və bu qətiyyən yolverilməzdir. Ermənistan hökuməti qərbi azərbaycanlıların təhlükəsiz qayıdışını təmin etməli, Konstitusiyası və digər sənədlərdən Azərbaycana və digər qonşu dövlətlərə qarşı ərazi iddialarını dərhal və qeyd-şərtsiz çıxarmaq üzərində işləməli və təhlükəli militarizasiya siyasətinə son qoymalı, Azərbaycanın şərtləri ilə hazırlanan sülh müqaviləsini imzalamalıdır".

Telegramda izləyin