Arxeoloqlar 2000 il əvvələ aid məzar tapdılar

Arxeoloqlar Hollandiyada təxminən 2000 il əvvələ aid olduğu güman edilən Roma məzarı aşkar ediblər.

Sonxeber.az türk mediasına istinadən xəbər verir ki, Heerlen bölgəsində tapılan Roma vətəndaşının "Flaccus" ləqəbli hərbçi olduğu ehtimal edilir.

Qəbirdən həmin şəxsə aid olduğu düşünülən qablar, boşqablar və tunc dəri də tapılıb. Kasaların birində "Flac" sözü həkk olunub ki, bu da tədqiqatçılara şəxsin adını təxmin etməyə imkan verib.

Heerlen Mədəniyyət və İrs Şurasının üzvü Jordy Clemens, "Bu kəşf keçmişimiz haqqında məlumat verməklə yanaşı, Roma dövründə Heerlenin Hollandiya üçün nə qədər əhəmiyyətli olduğunu göstərir. Bu dövrə aid bir Roma türbəsi heç vaxt tapılmamışdı" , - deyə açıqlama verib.

Qəbirdən çıxarılan əşyalar təmizləndikdən sonra yeni Heerlen Roma Muzeyində sərgilənəcək.

Qeyd edək ki, bölgədə əvvəllər tapılmış ən qədim xarabalıqlar eramızın 40-70-ci illərinə aid ictimai hamamlar idi.

Telegramda izləyin