Tozsoran niyə zəif çəkir? - 3 əsas səbəb

Tozsoran əvvəlki kimi tozları yaxşı təmizləmirsə, bu, cihazın sıradan çıxması demək deyil. Əksər hallarda problem çirklənmiş filtrlər, tıxanmış boru və ya dolmuş toz qabı ilə bağlı olur.

Lent.az xəbər verir ki, mütəxəssislərin fikrincə, bir neçə sadə yoxlama ilə problemin səbəbini müəyyənləşdirmək və əlavə xərc çəkmədən cihazın işini yaxşılaşdırmaq mümkündür.

Çirklənmiş filtrlər tozsoranın çəkmə gücünü azaldır

İlk növbədə tozsoranın filtrini yoxlamaq lazımdır. İstifadə zamanı filtr toz və kir hissəciklərini özündə saxlayır. Zaman keçdikcə bu hissəciklərin toplanması hava dövranını çətinləşdirir və cihazın çəkmə gücünü azaldır. Mütəxəssislər bildirirlər ki, tozsoranın modelindən asılı olaraq filtrlər yuyula və ya dəyişdirilə bilər. Təmizləməzdən əvvəl istehsalçının təlimatları ilə tanış olmaq vacibdir. Əgər filtr yuyulmalıdırsa, onu yenidən yerinə quraşdırmazdan əvvəl tam qurumasını gözləmək lazımdır. Nəm filtr cihazın işinə mənfi təsir göstərə bilər.

Dolmuş toz qabı və ya torbası cihazın səmərəliliyini azaldır

Toz torbası ilə işləyən tozsoranlarda torbanın həddindən artıq dolması hava axınını zəiflədə bilər. Oxşar vəziyyət torbasız modellərdə də müşahidə olunur. Toz qabındakı kirin miqdarı tövsiyə olunan həddi keçdikdə cihazın təmizləmə qabiliyyəti azalır. Mütəxəssislər toz qabını boşaltmağı və ya torbanı dəyişdirməyi, həmçinin bütün hissələrin düzgün yerləşdirildiyini yoxlamağı məsləhət görürlər. Bu əməliyyatları yerinə yetirərkən tozsoran mütləq söndürülməli və elektrik şəbəkəsindən ayrılmalıdır.

Tozsoranın borusunu və fırçasını yoxlayın

Tozsoranın borusu tük, saç və ya kağız parçaları ilə tıxana bilər. Bundan başqa, fırlanan fırçaya dolaşan saçlar və parça lifləri cihazın xalçalardakı çirki toplamasını çətinləşdirir. Mütəxəssislər tövsiyə edirlər ki, cihazı söndürüb elektrik şəbəkəsindən ayırdıqdan sonra boru, şlanq və başlıq diqqətlə yoxlanılsın. Tıxanmaları aradan qaldırarkən yalnız istehsalçının tövsiyə etdiyi üsullardan istifadə etmək lazımdır. Borunun içərisinə iti əşyalar salmaq məsləhət görülmür.

Hansı hallarda ustaya müraciət etmək lazımdır?

Filtrləri təmizlədikdən, toz qabını boşaltdıqdan və borunu yoxladıqdan sonra da tozsoran zəif işləyirsə, problem cihazın daxili mexanizmində ola bilər. Qeyri-adi səaqslər, yanıq qoxusu və cihazın tez-tez öz-özünə dayanması texniki nasazlığın əlamətləri hesab olunur. Belə hallarda tozsorandan istifadəni dayandırmaq və mütəxəssisə müraciət etmək tövsiyə edilir.

Telegramda izləyin