"Qazın və işığın bahalaşmasının nə iqtisadi, nə də sosial əsası var" - AÇIQLAMA

Azərbaycanda qaz və işıq bahalaşıb. Bu barədə Tarif Şurası qərar qəbul edib.

Əvvəl bir kilovat saat elektrik enerjisi üçün əhali azı 8 qəpik ödəyirdisə, indi 5 faiz daha çox, yəni 8.4 qəpik ödəyəcək.
Aylıq istehlak həcmi 200 kilovatt saatdan 300 kilovatt saatadək olanlar üçün qiymətlər 1 qəpik (11,1%) artırılaraq 9 qəpikdən 10 qəpiyə qaldırılıb.
Bir ay ərzində 300 kilovattdan çox elektrik enerjisi istifadə edənlər isə 2 qəpik daha çox ödəməli olacaqlar.

Qaz da bahalaşıb. Əvvəl əhali bir kub metr qaz üçün azı 12 qəpik ödəyirdisə, indi bu, yarım qəpik daha çox olacaq.
Əhali üzrə illik istehlak həcmi 1200 kub metrdən 2500 kub metrədək olan hissə üçün 2 qəpik (10%) artırılaraq 20 qəpikdən 22 qəpiyə qaldırılıb.
İldə 2500 kub metrdən çox qaz işlədənlər üçün isə qiymıt 5 qəpik bahalaşıb. İndi onlar bir kub metr üçün 25 qəbik yox, 30 qəpik ödəmıli olacaqlar.
Qiymət artımı ilə bağlı bu qərar 2 yanvar tarixindən qüvvəyə minib.

Bəs görəsən bu artımın səbəbi nədir?

Mövzu ilə bağlı sosioloq Elçin Bayramlı Sonxeber.az – a açıqlama verib:

"Kommunal xidmətlərin növbəti bahalaşması əslində gözlənilən idi. Baxmayaraq ki, bunun üçün heç bir əsas yox idi. Yəni, bu artımın nə iqtisadi, nə də sosial əsası var. Sadəcə bu, ölkədəki real infilyasiya tendensiyasının elementlərindən biridir. Planlı şəkildə belə bir sistem qurulub ki, hər şey davamlı olaraq bahalaşmalıdır. Qiyməti eyni qalan heç bir məhsul, xidmət yoxdur. Keçən ilki illik infilyasiya ortalama 50 faiz civarındadır. Baxmayaraq ki, hökumət bunu 5 faiz olaraq göstərir. Yəni 10 dəfə azaldır. Keçən ilki qiymətlərlə bu ilkiləri müqayisə etsəniz bunu özünüz də görə bilərsiniz. Bu o deməkdir ki, əhalinin vəziyyəti iki dəfə ağırlaşıb. Yaşayış şərtləri çətinləşib. Bir tərəfdən sosial problemlər ağırlaşır, digər tərəfdən dövlət bunu kompensasiya etmək əvəzinə daha da ağırlaşdırır.

Kommunal xidmətlərin istehsal olunması üçün maya dəyəri artmayıb. Məsələn qazın ildən-ilə istehsal həcmi artdıqca maya dəyəri aşağı düşür. Bu da o deməkdir ki, qiymət ucuzlaşmalıdır. Elektrik istehsalı da həmçinin ildən-ilə artır və maya dəyəri aşağı düşür. Lakin burda da qiymət ucuzlaşmır, əksinə bahalaşır. Bütün bunları nəzərə alsaq, qazın və işığın qiymətinin artmasının heç bir iqtisadi əsaslandırılması olmadığını görərik".

Çiçək Sadatova

Telegramda izləyin