Bağırsaqdakı təhlükəli bakteriyalar xərçəngə necə "kömək edir": Onkoloqun məsləhətləri

Əksər insanlar üçün onkoloji xəstəliklər genetika, pis ekologiya və həyat tərzi ilə əlaqələndirilir. Lakin xərçəngin inkişafında mühüm rol oynayan daha bir daxili faktor var - bu, insan orqanizmində yaşayan patogen mikroblardır.

Oxu.Az-ın gazeta.ru-ya istinadla məlumatına görə, rusiyalı mütəxəssis Aleksandr Seryakov bağırsaq mikroflorası ilə onkoloji proses arasındakı əlaqə barədə danışıb.

O, qeyd edib ki, bu gün yoğun bağırsaqda yaşayan patogen mikrofloranın necə davrandığını hər kəs bilmir.

"Bizim bağırsağımız 100 trilyondan çox mikroorqanizmdən ibarət mürəkkəb ekosistemdır. Bu bakteriyalar qidanı həzm etməyə kömək edir, infeksiyalardan qoruyur, böyüklərdə və uşaqlarda immunitet formalaşdırır. Lakin onların balansının pozulması şişlərin inkişafı üçün şərait yarada bilər. İnsana dost olan bakteriyalar belə vəziyyətdə patogenlərə çevrilir. Onlar hüceyrələrin DNT-sini zədələyir, xroniki iltihab və onkoloji proseslər yaradır, bəzi hallarda hətta şiş əleyhinə terapiyanın effektivliyini azaldır", - deyə Seryakov qeyd edib.

Həkim bildirib ki, kolorektal xərçəngi xəstələrinin mikroflorasının klinik tədqiqatları onların bağırsağında əsasən "Fusobacterium nucleatum" (Plaut çöpü), "Bacteroides fragilis" (fragilis bakteroidi) və "Escherichia coli" bağırsaq çöpü kimi patogen və şərti patogen bakteriyalar üstünlük təşkil etdiyini göstərib.

"Bu ştamların hər biri onkoloji proseslərin inkişafına öz töhfəsini verir. Məsələn, xərçəng xəstələrində bağırsaq mikroflorasının təxminən 80%-nin fuzobakteriyalarla (Plaut çöpü) məskunlaşdığı məlumdur. Bu mikroorqanizmlər təkcə bağırsaqda iltihabi proseslər yaratmır, həm də bədxassəli şişlərin böyüməsini sürətləndirir.

Seryakov vurğulayıb ki, bağırsaqda fuzobakteriyaların, fragilis və "Escherichia coli"nin aktiv böyüməsi qoruyucu baryer rolunu oynayan faydalı bakteriyaların koloniyalarının əhəmiyyətli dərəcədə azalması fonunda baş verir. Mikrofloranın belə disbalansı qaçılmaz olaraq ciddi sağlamlıq nəticələrinə gətirib çıxarır.

"Bağırsaq mikroflorası onkoloji risklərin mühüm markerlərindən biridir. Xəstələrin skrininqi zamanı yoğun bağırsaq bakteriyalarının diqqətlə qiymətləndirilməsi selikli qişanın bədxassəli transformasiyasının mümkün risklərini proqnozlaşdırmağa və xərçəngin inkişafının qarşısını almağa kömək edə bilər", - deyə o, yekunlaşdırıb.

Qeyd edək ki, laktobakteriyalar və bifidobakteriyaları artırmaq üçün rasionumuzda yumşaq pendirləri, təbii qatığı, ayranı, turşuya qoyulmuş kələmi, fermentləşdirilmiş məhsulları, göyərtiləri, təzə meyvə-tərəvəzləri, tam taxılları, paxlalıları artırmalıyıq.

Telegramda izləyin