"31 mart hadisələri, Azərbaycanın milli yaddaşında silinməz izlər buraxmışdır" - DEPUTAT

1918-ci ilin mart-aprel aylarında Azərbaycan xalqına qarşı baş verən etnik təmizləmə və kütləvi qırğınların bir hissəsidir. Bu soyqırımının məqsədi, Azərbaycanın müxtəlif bölgələrində etnik Azərbaycan əhalisinin məhv edilməsi və ya deportasiya edilməsi idi. Bu hadisə, ümumilikdə Cənubi Qafqazda baş verən digər qanlı münaqişələrin və soyqırımların bir hissəsi kimi qəbul edilir.

1918-ci ilin 30 mart və 3 aprel tarixləri arasında Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə Bakı Soveti və daşnak erməni silahlı dəstələri azərbaycanlıları kütləvi şəkildə vəhşicəsinə qətlə yetirmişlər.  Rəsmi mənbələrə əsasən, bu soyqırımın nəticəsində 12 minə yaxın azərbaycanlı amansızcasına öldürülmüş, on minlərlə insan itkin düşmüşdür.
Həmin dəhşətli günlərin şahidi olmuş Kulner familiyalı bir alman, 1925-ci ildə Bakı hadisələri barədə bunları yazmışdır: "Ermənilər müsəlman (azərbaycanlı) məhəllələrinə soxularaq hər kəsi öldürür, qılıncla parçalayır, süngü ilə dəlmə-deşik edirdilər. Qırğından bir neçə gün sonra bir çuxurdan çıxarılan 87 azərbaycanlı cəsədinin qulaqları, burunları kəsilmiş, qarınları yırtılmış, cinsiyyət orqanları doğranmışdır. Ermənilər uşaqlara acımadıqları kimi, yaşlılara da rəhm etməmişdilər." Gənc qadınların diri-diri divara mıxlanması, ermənilərin hücumundan sığınmağa çalışan iki min nəfərin yerləşdiyi şəhər xəstəxanasının yandırıldığı da bu dəhşətli faktlar sırasındadır.

İrəvan quberniyası, Şərur-Dərələyəz, Sürməli, Qars və digər ərazilərdə azərbaycanlıların qırğınının fəal iştirakçılarından biri olmuş erməni zabiti Ovanes Apresyanın xatirələri əsasında amerikalı aqronom Leonard Ramsden Hartvill "İnsanlar belə imişlər" adlı kitab yazmışdır. Ovanes Apresyan kitabın müəllifi ilə söhbəti zamanı ermənilərin, ingilislərin və rusların yardımı ilə öz məqsədlərinə çatdıqlarını qeyd edərək, təkcə Bakıda Mart qırğını zamanı iyirmi beş min azərbaycanlının qətlə yetirildiyini bildirmişdir.

Bu hadisələrin dəhşətini göz önünüzə gətirməyiniz üçün 1918-1920-ci illərdə mövcud olmuş Azərbaycan Demokratik Respublikası hökumətinin, Fövqəladə İstintaq Komissiyasının materiallarında göstərilir ki:
1918-ci ilin mart-aprel aylarında Şamaxıda 8 minə qədər dinc sakin qətlə yetirilimişdir. Şamaxı Cümə məscidi də daxil olmaqla əksər mədəniyyət abidələri yandırılmış və uçurulmuşdur.
Cavanşir qəzasının 28 kəndi, Cəbrayıl qəzasının 17 kəndi tamamilə yandırılmış, əhalisi məhv edilmişdir.
1918-ci il aprelin 29-da Gümrü yaxınlığında əsasən qadınlardan, uşaqlardan və yaşlılardan ibarət 3 min nəfərlik azərbaycanlı köçü pusquya salınaraq son nəfərinədək məhv edilmişdir.
Erməni silahlı dəstələri Zəngəzur qəzasında 115 azərbaycanlı kəndini məhv etmiş, 3257 kişi, 2276 qadın və 2196 uşağı öldürmüşdülər. Bütövlükdə bu qəza üzrə 10068 azərbaycanlı öldürülmüş və ya şikəst edilmiş, 50000 azərbaycanlı qaçqın düşmüşdür.

İrəvan quberniyasının 199 kəndində yaşayan 135 min azərbaycanlı məhv edilmiş, kəndlər isə yerlə yeksan edilmişdir. Erməni silahlı dəstələri daha sonra Qarabağa yürüş etmiş, 1918-1920-ci illər arasında Qarabağın dağlıq hissəsində 150 kənd dağıdılımış, əhalisi məhv edilmişdir.

Göründüyü kimi erməni silahlı dəstələri tərəfindən azərbaycanlılara qarşı törədilən soyqırım hadisəsi, Azərbaycan tarixində 31 mart Soyqırımı olaraq qeyd olunur. Bu gün, Azərbaycanın müxtəlif bölgələrində çox sayda azərbaycanlı öldürülmüş, evlər yandırılmış və çoxsaylı insanlar qaçmağa məcbur olmuşdur. Bu hadisələr, bir çox yerli erməni silahlı dəstələrinin, həmçinin erməni dövlətinin dəstəyi ilə həyata keçirilmişdir.

Bu soyqırım, Azərbaycan xalqının üzləşdiyi ən qanlı və faciəli dövrlərdən biridir və bu gün də Azərbaycanın müstəqillik və ərazi bütövlüyü uğrunda mübarizəsində mühüm bir mərhələni təşkil edir. 31 mart hadisələri, Azərbaycanın milli yaddaşında silinməz izlər buraxmışdır.

Uzun illər keçməsinə baxmayaraq, bu hadisəyə ilk dəfə qiyməti Ulu Öndər  Heydər Əliyev Azərbaycan Respublikasının Prezidenti kimi 26 mart 1998-ci il tarixdə "31 mart Azərbaycanlıların Soyqırımı Günü" kimi qeyd olunması barədə sərəncam imzalamışdır. O gündən ölkəmizdə hər il "31 mart Azərbaycanlıların Soyqırımı Günü" kimi qeyd olunaraq soyqırım qurbanlarının xatirəsi ehtiramla yad edilir.

Şahin Seyidzadə
Milli Məclisin deputatı

Telegramda izləyin