Par-par parıldayacaq: fincanları çay ləkəsindən necə təmizləmək olar?

Fincanlardan istifadə zamanı onların içərisində çay və ya qəhvə ləkələri yaranır və onlardan qurtulmaq bəzən çətin olur. Amma xoşbəxtlikdən bu problemi sadə vasitələrlə həll etmək mümkündür.

Lent.az bu barədə faydalı üsulları təqdim edir:

1. Qida sodası
Qida sodası demək olar ki, bütün ləkələri təmizləməyə kömək edir. Onu təmiz halda və ya suyla qarışdıraraq istifadə etmək olar. İkinci variant daha yumşaq təmizləmə üçündür.

Necə tətbiq etməli?

1 xörək qaşığı soda götürün. Bir neçə damcı ilıq su əlavə edin və qarışdırın. Alınan pastaya bənzər qarışığı ləkələrin üzərinə sürtün. Bir neçə dəqiqə saxlayın, sonra təmiz su və süngərlə yuyun.

2. Limon turşusu
Çay və qəhvə ləkələrini təmizləmək üçün başqa bir effektiv vasitədir.

Necə tətbiq etməli?

Çirklənmiş fincana 2 çay qaşığı limon turşusu əlavə edin. Yarım limonun suyunu tökün. Qarışığı fincanın divarlarına sürtün və 5 dəqiqə saxlayın. Sonra fincanı isti suyla yuyun və qurulayın.

3. Sirkə

Adi süfrə sirkəsi də bu iş üçün idealdır.

Necə tətbiq etməli?

Pambıq diski sirkəyə batırın. Ləkələri dairəvi hərəkətlərlə silin. Bir neçə dəqiqədən sonra çirklər yox olacaq. Sonda fincanı isti suyla yaxşıca yuyun, çünki sirkənin qoxusu qala bilər.

4. Diş pastası

Sadə, amma çox təsirli üsuldur.

Necə tətbiq etməli?

Fincanın divarlarına bir az diş pastası çəkin. Süngərlə ovuşdurun. Sonra təmiz su ilə yaxşıca yuyun.

5. Duz

Ən yaxşısı iri dənəli duzdan istifadə etməkdir. Ancaq ehtiyatlı olmaq lazımdır ki, qab zədələnməsin.

Təhlükəsiz üsul:

Fincanları duzlu suda 2 saat saxlayın. 1 litr isti suya 1 çay qaşığı duz əlavə edin və fincanları bu məhlulda isladın.

Telegramda izləyin