Milyonlarla insana təsir edən xəstəlikdən qorunmağın sadə yolları - Rusiyalı nevroloqdan açıqlamalar

Altsheymer xəstəliyi bütün dünyada milyonlarla insanı təsir altına alan demensiyanın ən çox yayılmış formalarından biridir. Lakin bu xəstəliyin qarşısını almağın sadə yolları var ki, bunlardan biri də beyində yarımkürələr arasında əlaqələrin inkişafıdır.

Oxu.Az-ın xəbərinə görə, bu barədə rusiyalı nevroloq Yekaterina Maxnoviç KP.ru-ya müsahibəsində danışıb.

"Beynin yarımkürələrinin sinxronizasiyası bizə daha yaxşı yadda saxlamağa, nitqi daha yaxşı qavramağa, diqqəti daha tez cəmləməyə və bir fəaliyyətdən digərinə keçməyə kömək edir. Yarımkürələr arasında əlaqələri "qeyri-dominant" əl vasitəsilə yerinə yetirilən sadə gündəlik hərəkətlərin köməyi ilə də inkişaf etdirmək mümkündür. Məsələn, sağ əllə iş görürsünüzsə, dişlərinizi sol əlinizlə fırçalayın və ya solaxaysınızsa, əksinə", - deyə Yekaterina Maxnoviç bildirib.

Onun sözlərinə görə, bu cür məşqlər beynin əks yarımkürələrini aktivləşdirir və yeni neyron əlaqələri qurmağa kömək edir.

Bundan əlavə, Altsheymer xəstəliyinin inkişaf riski xroniki stres və depressiya səbəbindən əhəmiyyətli dərəcədə artır. Tədqiqatlar göstərir ki, bir neçə depressiya epizodundan sonra demensiyanın yaranması ehtimalı iki-üç dəfə artır.

"Gündəlik yaradıcılıq və intellektual fəaliyyətlər depressiya əlamətlərini azalda, həmçinin beynimizə kömək edə bilər. Tapmacaların həlli, krossvordların və ya skanvordların tapılması, şahmat oynamaq və ya digər fəaliyyətlər zehni fəaliyyət, konsentrasiya və yaxşı yaddaş tələb edir", - deyə o əlavə edib.

Telegramda izləyin