Şakira konsertindən sonra təhlükə siqnalı: Minlərlə insan risk altındadır

Keçən həftə ABŞ-ın Nyu-Cersi ştatındakı MetLife stadionunda konsert verən latin musiqisinin ulduzu Şakira, on minlərlə pərəstişkarını möhtəşəm çıxışı ilə coşdursa da, tədbirdən sonra yayılan xəbər ciddi narahatlıq yaradıb.

Sonxeber.az xarici mediaya istinadən xəbər verir ki, Nyu-Cersi Səhiyyə Departamentinin (NJDOH) məlumatına görə, konsert iştirakçılarından biri — ştat xaricindən gələn bir nəfərdə qızılca aşkar olunub və həmin şəxs virusu başqalarına da yoluxdura biləcək vəziyyətdə olub. Rəsmilərin açıqlamasına görə, tədbirdə iştirak edən hər kəs qızılcaya məruz qalmış ola bilər.

Departament xəbərdarlıq edib ki, yoluxmuş şəxslərlə təmasda olan insanlarda simptomlar ən geci 6 iyuna qədər özünü göstərə bilər. Bu səbəbdən on minlərlə insan üçün qarşıdakı günlər kritik əhəmiyyət daşıyır.

Məlumat üçün qeyd edək ki, 2025-ci ildə ABŞ-da qızılca hallarının sayı sürətlə artmaqdadır. ABŞ Xəstəliklərə Nəzarət və Profilaktika Mərkəzinin (CDC) və ştat səhiyyə idarələrinin verdiyi məlumata əsasən, may ayının ortalarına olan vəziyyətə görə ölkə üzrə 1000-dən çox qızılca hadisəsi qeydə alınıb.

Bu halların böyük əksəriyyəti Texas ştatında cəmləşib və yoluxma sayı burada 700-dən çoxdur.

Telegramda izləyin