Hailey Bieberdən milyard dollarlıq addım

Gözəllik dünyasında böyük bir satınalma baş tutub. Hailey Bieber-in 2022-ci ildə təsis etdiyi və qısa müddətdə qlobal bir kosmetik brendə çevrilən Rhode, ABŞ mərkəzli kosmetika nəhəngi e.l.f. Cosmetics tərəfindən 1 milyard dollara satın alınıb.

Sonxeber.az xarici mediaya istinadən xəbər verir ki, 28 yaşlı model və sahibkar Hailey Bieber bu xəbəri 28 may tarixində öz rəsmi Instagram hesabında paylaşaraq ictimaiyyətə açıqlayıb. Bieber paylaşımında bunları deyib:

"Rhode markasını qurarkən ən böyük arzum onu dünya üzrə daha çox insana çatdırmaq idi. İndi bu arzum reallaşır. Özümü heç vaxt bu qədər həyəcanlı və hazır hiss etməmişdim. Rhode icmasına və komandama minnətdaram. Bu yeni dövr bizim üçün daha da heyrətamiz olacaq!"

Hailey bildirib ki, anlaşmadan sonra da Rhode markasındakı aktiv rolunu davam etdirəcək, markanın idarəçiliyində iştirak edəcək və eyni zamanda e.l.f. Beauty-nin strateji müşaviri kimi fəaliyyət göstərəcək.

Hailey Bieber-in həyat yoldaşı Justin Bieber də bu uğuru qeyd etməyi unutmayıb. O, həyat yoldaşının paylaşım görüntüsünü öz Instagram hesabında paylaşaraq yorumsuz şəkildə dəstəyini ifadə edib. Bu jesti izləyiciləri tərəfindən alqışla qarşılanıb.

Telegramda izləyin