"Yazırlar ki, Allah balanı öldürsün!" - Tolik uşağının anasını axtaranlara cavab verdi

Sonxeber.az Yenisabah.az-a istinadla tanınmış prodüser, teleaparıcı Tarix Əliyevlə müsahibəni təqdim edir.

- Artıq uzun illərdir ki, səhnədəsiniz. Bütün bu illər ərzində sizi zirvədə saxlayan nədir?

- Mən camaat üçün ona görə maraqlıyam ki, millət otursun, məni müzakirə etsin. Ona görə də, mən özümə söz vermişəm ki, bundan sonra heç nə etməyəcəyəm. Heç bir böyük işə əl qatmayacağam. Yüzlərlə yaxşı iş görürəm media üçün maraqlı olmur. Bir dəfə də media mən olmadan yazardı ki, Tolik yüzlərlə iş görür. Bir ziyalısı, bir ağıllısı çıxıb demədi ki, bu adam o qədər xeyirxah işlər görürür.

- Xeyirxah əməlləriniz də çoxdur. Bunları edərkən, hansı məqamları daha üstün tutursunuz?

- Bu yaxınlarda Lalə Azərtaşın verilişinə bir ailə gəlmişdi. İki qızı var idi. Deyirdi ki, hamamımız yoxdur, uşaqları vannada çimizdirirəm. Qız uşaqları olduğu üçün ürəyim dözmədi. Həmin adama zəng vurdum, dedim ki, qardaş, mən sənin üçün hamam tikdirəcəm. Adamın kartına da 1500 manat pul göndərdim. Adam da götürüb o pulu istifadə edib. İnsanlara artıq yaxşılıq da etmək olmur. O adam həmin 1500 manatı bəlkə də, beş aya qazanacaqdı. Hazır vermişəm də, istifadə et.

- Bəs bu sizdə tükənmişlik hissi yaşatmır?

- İnsan belə şeyləri görəndə heç nə etmək istəmir.

- Bu gün efirlərdə ekspert rolunu oynayan müğənnilər haqqında nə düşünürsünüz?

- Bu gün də əminliklə deyirəm ki, efirlərə çıxan müğənnilərin çoxu xalqın qarşısına çıxıb, əxlaqdan dərs deyə bilməz. Sosial verilişlərdə müğənni oturub, camaata, nəbilm ucqar kənddən gəlmiş bir insana məsləhət verə bilməz. Orada elə bir insan oturmalıdır ki, onun ailəsində, dəyərlərində problem olmasın. Həyatda hansısa bir uğurları olsun.

- Son zamanlarda övladınızla bağlı gündəmə gəldiniz. Hətta 46 yaşınızı da onun 3 aylığı ilə birlikdə qeyd edəcəksiniz. Övladınızın üzünü göstərməməyinizin səbəbi nədir?

- Vallah, o qədər səviyyəsiz insanlar var ki, mənim üç aylıq balama qarğış edəcək həddədirlər. Ona görə üzünü göstərmirəm. Mənim övladım kimdən artıqdır ki, heç kəsdən artıq deyil. Amma mən onu ona görə göstərmirəm ki, həyatda çöpü çöpün üstünə qoya bilməyən min dənə insan ağzına gələni girib yazacaq. Üç aylıq körpə uşağı söyən millətdən nə gözləyim?

- Deyəsən, pis rəylər sizə çox təsir edir...

- Əlbəttə, uşaqla bağlı da nə isə paylaşıram, rəylərdə yazılır ki, hanı bunun anası? Ay insanlar, axı siz hansı dövrdə yaşayırsınız? Süni mayalanmanı bilməyən şəxslərsiniz. Bundan sonra nə deyim axı?!

- Balaca Milananın üzünü göstərməsəniz də, bəzən sosial şəbəkələrdə uşaqla bağlı müəyyən reklamlar edirsiniz.

- Bəli, 1-2 dəfə reklam etmişəm, o da hədiyyə göndərdikləri üçün. Rəylərə baxıram, yazırlar ki, Allah balanı öldürsün. Üç aylıq körpənin nə günahı var axı? Biz belə cəmiyyətdə yaşayırıq. Ona görə də övladım haqqında heç nə danışmaq istəmirəm.

- Hazırda övladınıza kim baxır?

- Uşağıma hazırda dayə baxır. Dayənin də yanında beş gün bacım qalır, beş gün də bibim. Evimdə təmir getdiyi üçün, yanımızda başqa ev tutmuşam, orada qalıb övladıma baxırlar. Çünki mən istəyirəm ki, uşaq ailə nəvazişi görsün.

- Ata olmaq həyatınızda nələri dəyişdi? Gündəlik həyatınıza və düşüncələrinizə necə təsir etdi?

- Övladın olması gündəlik həyatıma təsir edir. Əvvəl tək işim idi. İndi övladım da olduğu üçün mən hər işimi ona uyğun planlaşdırıram. Səhər 09:30-da verilişim başlayır, işdən sonra da 1-2 saat ərzində hər şeyi tamamlayıb, evə tələsirəm. Günümün 3-4 saatını övladıma həsr edirəm. Bunu qoxuma öyrəşsin, aradakı bağ qurulsun deyə edirəm. Evdə olmayanda da bibimə, bacıma zəng vurub görüntülü danışıram. Səhərlər televiziyada mənə baxır, səsimi də tanıyır. Çalışıram ki, övladım hər hansısa mövzulara alət olmasın. Məsələn, yayda dostlarımla tətil planları qurmuram. Yeni ildə düşünürdüm ki, xaricə gedərəm, amma övladımla birlikdə olacam. Bütün həyatımı ona həsr etmişəm.

Telegramda izləyin