Sosial media fenomeni azyaşlıya hücum iddiası ilə bağlı səssizliyini pozdu

YouTube platformasında 1.5 milyona yaxın, Instagram-da isə 930 minə yaxın izləyicisi olan məşhur fenomen Testo Taylan, bu dəfə videoları ilə deyil, adı qarışdığı şiddət qalmaqalı ilə gündəmdədir.

Sonxeber.az türk mediasına istinadən xəbər verir ki, son vaxtlar bir çox internet məşhuru ilə çəkdiyi videolarla tanınan Taylan, 13 yaşlı bir izləyicini döyməkdə ittiham olunur və bu səbəbdən polis tərəfindən gözaltına alınıb.

İddialara görə, gənc bir fanatını fiziki zorakılığa məruz qoyan Taylan polis bölməsinə aparılıb. Orada ifadəsi alındıqdan sonra sərbəst buraxılıb. Hadisə sosial mediada geniş əks-səda doğurduqdan sonra Taylan şəxsi hesabından açıqlama yayıb.

O, paylaşımında aylardır müxtəlif təxribatlara məruz qaldığını bildirib:

"Çox sayda yalan məlumat var. Mən hadisəni izah edim. Hazırda İzmitdəyəm, normalda burada yaşamıram. Burada ailə evimiz var. Vaxtaşırı gələndə ünvan məlum olduğuna görə məni ciddi narahat edirlər. Evimin həyətinə girirlər, qapını döyürlər, söyüş söyürlər, evin qarşısında dayanıb təhqir edirlər və sonra qaçırlar. 15 nəfərlik uşaq və gənc dəstəylə gəlirlər. Onları dəfələrlə sözlə xəbərdar etmişəm. Səbir etmişəm. Yuxudan durursan, qarşıda biri bağırır, sən çıxanda qaçır. Ailəmə qarşı da söyüşlər olub. Elə bir vəziyyət yaranıb ki, insanı əsəbiləşdirib reaksiya göstərməyə vadar edirlər. Əlbəttə, mən daha səbirli olmalı idim. Heç çıxmamalı idim".

Hazırda hadisə ilə bağlı təfərrüatlar araşdırılır. Taylanın açıqlamaları sosial mediada birmənalı qarşılanmayıb və istifadəçilər arasında müzakirələrə səbəb olub.

Telegramda izləyin