Corab satan Allahverdi Yolçuyev: "Kiməsə ağız açmaq yox, normal təqaüd istəyirəm"

Azərbaycanın tanınmış aktyoru Allahverdi Yolçuyev maddi çətinliklər səbəbindən corab satdığını bildirib. Sözügedən məsələ rezonansa səbəb olub.

Bəs görəsən, aktyora dövlət qurumlarından hansısa formada dəstək təklif olunubmu? Ümumiyyətlə, aktyorun gözləntisi nədir?

Oxu.Az-ın əməkdaşı Allahverdi Yolçuyevlə söhbətləşib.

O bildirib ki, xəstələndikdən sonra dərman xərclərini qarşılamaq üçün bu yola əl atıb:

"Heç kimə ağız açmamışam, heç kəsin qapısını döyməmişəm. Mən bu cür insan deyiləm. Amma dərman xərclərini qarşılamaq üçün corab satıram. Media sağ olsun, hər şeyi məndən yaxşı bilir. Yazılır, pozulur, danışılır, amma nəticə yoxdur. Mən normal bir təqaüd istəyirəm. Başqa heç nə istəmirəm".

Aktyor qeyd edib ki, Mədəniyyət Nazirliyi ona müəyyən dəstək göstərib:

"Nazir Adil Kərimli mənimlə birbaşa əlaqə saxladı. Dedi, nəyə ehtiyacın varsa, de. Maddi yardım da etdi, sağ olsun. Amma bu, birdəfəlik idi. Bir manat da versələr, təşəkkür edirəm. Amma mən normal, sabit bir təqaüd istəyirəm ki, yaşamaq mümkün olsun. May ayında rəsmi məktub da yazmışam. Tez-tez başqalarına ağız açan adam deyiləm. Bu, mənə xoş olmur".

Allahverdi Yolçuyev əlavə edib ki, bir çox aktyor bu gün ağır şəraitdə yaşayır:

"Elə aktyorlar var ki, məndən də pis vəziyyətdə yaşayırlar. Onlar üçün bir şey fikirləşmək lazımdır".

Telegramda izləyin