TikTok Azərbaycanda marketinqi necə dəyişir — Barış Aldanmaz ilə müsahibə

TikTok qısa zamanda rəqəmsal dövrün ən güclü marketinq platformalarından birinə çevrilib. Yaradıcılıq iqtisadiyyatının sürətlə inkişaf etdiyi Azərbaycanda isə brendlər artıq TikTok-u təkcə reklam vasitəsi kimi deyil, həm də əlaqə qurmaq, birgə yaratmaq və inkişaf etmək üçün seçirlər.
Bu müsahibə Bakıda keçirilən InMerge Innovation Summit çərçivəsində baş tutub. Rəqəmsal transformasiyanın gələcəyinin müzakirə olunduğu tədbirdə fikir liderləri, texnoloji yenilikçilər və biznes strategları bir araya gəlib. Biz isə TikTok-un Türkiyə, Azərbaycan, Mərkəzi və Cənubi Asiya üzrə Qlobal Biznes Həlləri rəhbəri Barış Aldanmaz ilə platformanın istehlakçı davranışlarını necə dəyişdirdiyini, bizneslərin inkişafına necə imkan yaratdığını və brendlərin kontent əsaslı, yaradıcı mərkəzli dünyada kommunikasiya tərzini necə yenidən formalaşdırdığını müzakirə etdik.
Rəqəmsal təhlükəsizlikdən və brend imicindən tutmuş Azərbaycanın real uğur hekayələrinə qədər olan bu söhbət TikTok-un marketinq ekosisteminə daxildən bir baxış təqdim edir — və yaradıcılıqla düşünməyə, səmimi davranmağa və rəqəmsal dövrdə mənalı əlaqələr qurmağa hazır olan bizneslər üçün bunun nə demək olduğunu göstərir.
1. Əyləncə məqsədilə yaradılan TikTok necə oldu ki, eyni zamanda marketinq platformasına çevrildi? Bu keçid necə baş verdi?
Əvvəldən TikTok insanların özünü azad və yaradıcı şəkildə ifadə edə biləcəyi, eyni zamanda əylənəcəyi bir məkan kimi yaradılmışdı. Lakin çox keçmədən aydın oldu ki, istifadəçilər platformadan təkcə əyləncə üçün deyil, həm də öyrənmək, araşdırmaq və yeni şeylər kəşf etmək üçün istifadə edirlər.
Bu dəyişikliyin ən parlaq nümunələrindən biri #TikTokMadeMeBuyIt trendləridir. Dünyanın müxtəlif yerlərindən milyonlarla insan bu trendlə öz alış tövsiyələrini, məhsul və brend rəylərini paylaşaraq artıq 24 milyondan çox paylaşım edib. Azərbaycanda və qlobal miqyasda biz fərqli ölçülü şirkətlərin — kiçik bizneslərdən tutmuş böyük brendlərə qədər — TikTok vasitəsilə tamamilə yeni auditoriyalara çatdığını görürük. Bunun səbəbi isə sadədir: bu gün istifadəçilər ənənəvi reklamları görmək istəmirlər. Onlar gündəlik həyata yaxın, səmimi və yaradıcı kontent axtarırlar — TikTok isə məhz bunu təklif edir. Platforma brendlərə auditoriya ilə təbii, sanki məcburi olmayan bir əlaqə qurmaq imkanı yaradır.
Bir çox cəhətdən bu dəyişiklik platformanın məqsədinin dəyişməsindən deyil, insanların ondan istifadə tərzindən qaynaqlandı. Biz isə bu keçidi daha da sürətləndirmək üçün brendlərə uyğunlaşdırılmış reklam həlləri və yaradıcı alətlər təqdim etdik. Nəticədə, TikTok bu gün marketinq və əyləncənin bir-birini tamamladığı güclü bir məkana çevrilib.

2. Bizneslər müasir istifadəçi haqqında nələri bilməlidir? TikTok kimi platformaların yaranması istehlakçı davranışına təsir göstəribmi, əgər göstəribsə, necə?
Bu günün rəqəmsal marketinq mühitində bütün ölçülü və sektordakı bizneslər üçün vacib bir dəyişkənliyi başa düşmək önəmlidir: onlar artıq passiv istehlakçılarla əlaqə qurmaqla kifayətlənmirlər. Müasir istifadəçilər kontent ekosistemində aktiv iştirakçılara — hətta yaradıcılar səviyyəsinə çevriliblər və bu, brendlərin kommunikasiya dinamikasını əhəmiyyətli dərəcədə dəyişib.
TikTok kimi platformalar bu transformasiyanı sürətləndirərək kontent yaradılmasını demokratikləşdirib. Yaradıcı olmağın qarşısındakı əngəllər demək olar ki, tamamilə aradan qalxıb. Nəticədə, həm yaradılan kontentin həcmi, həm də müxtəlifliyi sürətlə artır. İstifadəçilər artıq sadəcə kontenti seçib istehlak etmirlər — onlar onu formalaşdırır, fərdiləşdirir və tez-tez onun yaradılmasında əməkdaşlıq edirlər. Bu, digər yaradıcılarla və hətta brendlərlə qarşılıqlı əlaqələri də əhatə edir.
Bizneslər üçün isə bu, səmimiyyətin, yaradıcılığın və istifadəçi əlaqəsinin əsas olduğu bir dünyaya uyğunlaşmaq deməkdir. Brendlər ənənəvi mesajlaşmadan çıxmalı və kontent təcrübəsinin bir hissəsi olma yollarını tapmalıdır — birgə yaratmaq, əməkdaşlıq etmək və istifadəçi tərəfindən yaradılan kreativliyin mərkəzində aktual qalmaq.
Biz brendləri yalnız reklamçı olmaqla kifayətlənməyə deyil, yaradıcı olmağa və adi TikTok yaradıcıları kimi özlərini ifadə etməyə, istifadəçilərlə səmimi və orqanik kontent vasitəsilə əlaqə qurmağa təşviq edirik. Azərbaycanda bunun ilhamverici nümunələrini artıq görürük. Azerbaijan Airlines (AZAL) (@azerbaijanairlines) kontentinə insan toxunuşu gətirərək pilotları və stüardessaları təqdim edir, təyyarə parkını göstərir, xüsusi təklifləri elan edir və brend bağlılığını artıran səhnəarxası anları paylaşır. Birmarket (@birmarket_az) TikTok-dan yeni cihazlar, məhsul təqdimatları və gündəlik həyatda istifadə olunan praktik əşyaları təqdim etmək üçün effektiv istifadə edir, əyləncəni faydalılıqla birləşdirir. Red Bull Azerbaijan (@redbullaz) isə hədəf auditoriyasının maraqlarını yüksək enerjili idman kontenti paylaşmaqla əhatə edir, bu da brendin kimliyi və aktiv həyat tərzini dəstəkləmə missiyası ilə tam uyğundur.
3. TikTok ötən il Azərbaycanda brendlər üçün reklam həllərini təqdim etdi. İndiyə qədər yerli şirkətlərin bunlardan uğurla istifadə etdiyini gördünüzmü?

Əlbəttə. TikTok For Business-in Azərbaycanda istifadəyə verilməsindən bəri, TikTok-un marketinq platforması kimi potensialını araşdırmaq istəyən yerli şirkətlər arasında güclü və artan maraq görürük. Hələ bazarda nisbətən gənc bir oyunçu olsaq da, TikTok artıq regiondakı bir çox aparıcı brendlər üçün media miksinin strateji komponentinə çevrilib.
Azərbaycan dinamik, sürətlə inkişaf edən bazara malikdir və burada yaradıcılıq iqtisadiyyatı artır. Biz həmçinin yerli brendlərin platformadan istifadə edərək real biznes nəticələri əldə etməsinin təsirli nümunələrini görürük.
Xüsusi nümunələrdən biri Birbank, Azərbaycanın ilk rəqəmsal bankıdır. Birbank 18–44 yaş arası maliyyə xidmətləri ilə maraqlanan istifadəçiləri hədəfləyən TikTok-da "Lead generation" kampaniyası həyata keçirib. TikTok-un "In-Feed Ads" formatından — istifadəçilər üçün təbii və fasiləsiz təcrübə təqdim edən və auditoriya anlayışlarımızdan istifadə etməklə, Birbank yalnız "Lead generation" hədəflərinə çatmaqla kifayətlənmədi, onları da aşdı. Bu kampaniya TikTok-un ənənəvi kanallarla müqayisədə effektivliyini sübut edən güclü bir nümunə oldu.
Başqa bir nümunə isə ölkənin aparıcı telekommunikasiya operatoru olan Azeronline-dir. Onların məqsədi yüksək keyfiyyətli lead-lar əldə etmək və rəqəmsal icmalarını böyütmək idi. TikTok-un reklam həllərindən istifadə edərək, Azeronline paket abunələrində 43% artım əldə etdi, digər platformalarla müqayisədə baxış başına xərci 86% azaltdı və izləyici bazasını əhəmiyyətli dərəcədə genişləndirdi. Kampaniya performans marketinqini səmimi istifadəçi əlaqəsi ilə uğurla birləşdirdi və TikTok-da yerli kontentin gücünü nümayiş etdirdi.
Bu nümunələr göstərir ki, TikTok Azərbaycandakı brendlərə yalnız auditoriyaya çatmaqla kifayətlənməyib, onlarla mənalı, yaradıcı şəkildə əlaqə qurmağa və ən önəmlisi, ölçülə bilən nəticələr əldə etməyə imkan verir. Biz regiondakı biznesləri TikTok vasitəsilə innovasiya etməyə və böyüməyə davam etdikcə dəstəkləməkdən məmnunuq.

4. Brendlər üçün hədəf auditoriyanı cəlb edəcək qədər yaradıcı -"mükəmməl kontent" hazırlamaq üçün bir resept varmı?
"Mükəmməl kontent" üçün hər kəsə uyğun universal bir formul yoxdur, çünki hər brendin unikal auditoriyası, mesajı və məqsəd dəsti var. Buna baxmayaraq, TikTok kimi platformalarda uğuru davamlı təmin edən bir neçə təsdiqlənmiş prinsip mövcuddur.
Ən önəmlisi, kontent sadə və səmimi olmalıdır. TikTok istifadəçiləri bir şeyin həqiqi olub-olmadığını, artıq istehsal olunub-olunmadığını hiss edə bilir və onlar özünü daha çox yaxın və səmimi hiss etdirən kontentə daha müsbət reaksiya verirlər.
İkincisi, diqqəti ilk bir neçə saniyədə cəlb etmək çox vacibdir. Platforma sürətlidir və istifadəçilər dərhal maraq oyatmayan kontenti asanlıqla keçə bilərlər. Videonun başlanğıcında güclü və cəlbedici bir "başlanğıc element" böyük fərq yaradır.
Üçüncüsü, həm yerli, həm də qlobal trendlərdən istifadə etmək çox effektivdir. Brendlər kontentlərini auditoriyası üçün aktual və mədəni cəhətdən uyğun mövzularla uzlaşdırdıqda, bu, yalnız əlaqəni artırmır, həm də kontentin orqanik şəkildə paylaşılma ehtimalını yüksəldir.
Nəhayət, yaradıcı olmaq hər kampaniyanın mərkəzində olmalıdır. Bu, brend mesajını ənənəvi və ya məcburi şəkildə çatdırmaq deyil — hekayələr danışmaq, emosiyalar oyatmaq və ya insanları güldürməkdir. Kontent həm əyləncəli, həm də gündəlik həyata bağlı olduqda, istifadəçilərdə daha dərindən rezonans yaradır və brend bağlılığını gücləndirir.

5. TikTok rəqəmsal təhlükəsizliyə, xüsusilə də bu bazarda gənc istifadəçilərə necə yanaşır?
İcma təhlükəsizliyi — xüsusilə gənc istifadəçilərimizin təhlükəsizliyi — TikTok üçün həmişə ən prioritet məsələdir. Biz Azərbaycan da daxil olmaqla bütün bazalarda təhlükəsiz, inklüziv və pozitiv mühit yaratmağa sadiqik. Təhlükəsizliyə yanaşmamız qabaqcıl texnologiyanı minlərlə təhlükəsizlik üzrə mütəxəssisdən ibarət qlobal komandamızla birləşdirir; bu komandada yerli azərbaycanlı mütəxəssislər da var və onlar hər gün İcma Qaydalarının tətbiqini təmin edirlər.
Kontent moderasiyasına proaktiv yanaşırıq. 2025-ci ilin 1-ci rübü üzrə İcma Qaydalarının Tətbiqi Hesabatına görə, yalnız Azərbaycanda 1 milyondan çox video qayda pozuntusu səbəbindən silinib, onların 97%-i yayımlandıqdan sonra 24 saat ərzində aradan qaldırılıb — bu, qlobal ortalamanı üstələyir.
Gənc istifadəçilərin təhlükəsizliyi xüsusilə diqqət mərkəzimizdir. İcma Qaydalarımızın ayrıca bir bölməsi 18 yaşdan kiçik istifadəçilərə həsr olunub. Ən önəmlisi, istifadəçilər TikTok-a daxil olmaq üçün minimum yaş tələbinə cavab verməlidirlər. Platforma yalnız 13 yaş və yuxarı şəxslər üçün nəzərdə tutulub. Əgər hesabların bu yaşdan kiçik istifadəçilər tərəfindən idarə olunduğu aşkar edilərsə, moderasiya komandamız onları dərhal silir. Bundan əlavə, hər hansı bir istifadəçi şübhəli yetkinlik yaşından kiçik hesabları tətbiq və ya veb sayt vasitəsilə bildirə bilər, bu da bu vacib siyasətin tətbiqini gücləndirməyə kömək edir.
Yaş məhdudiyyətlərindən əlavə, yeniyetmələr üçün sənaye səviyyəsində qabaqcıl təhlükəsizlik tədbirləri tətbiq etmişik: 18 yaşdan kiçik istifadəçilər üçün standart gizlilik parametrləri, canlı yayımlara və birbaşa mesajlara məhdudiyyətlər, həmçinin yaşa uyğun təcrübəni təmin edən diqqətlə hazırlanmış siyasətlər.
Öhdəliyimiz açıqdır: zərərli kontenti proaktiv şəkildə silmək, risklərin baş vermədən qarşısını almaq və icmamızı rəqəmsal baxımdan məsuliyyətli bir mühit yaratmağa yönəltmək.
6. Bu günlərdə ümumiyyətlə onlayn təhlükəsizlik, o cümlədən brend imicinin qorunması barədə çox danışılır. TikTok-da brendin reputasiyasının təhlükəsizliyi necə təmin edilə bilər? Brend təhlükəsizliyi nələri əhatə edir?

İstifadəçilərimizin təhlükəsizliyinin qorunması, platformamızda reklam verməyi seçən brendlərin bütövlüyünün qorunması ilə sıx bağlıdır. Biz başa düşürük ki, brendin reputasiyası yalnız mesajına deyil, həm də onun göründüyü mühitə olan etimada əsaslanır. Buna görə də reklamçılar üçün təhlükəsiz və uyğun bir ekosistem qurmaq üçün əhəmiyyətli investisiyalar etmişik.
TikTok-da brend təhlükəsizliyi, icma təhlükəsizliyinə olan öhdəliyimizdən başlayır. Zərərli kontentin tez bir zamanda aradan qaldırıldığı bir platforma saxlamaqla, biz ümumi mühitin pozitiv, hörmətli və təhlükəsiz olmasını təmin etməyə kömək edirik — bu, brendlərin auditoriyaları ilə etimadla əlaqə qura biləcəyi bir məkandır.
Gənc auditoriya üçün isə brend kontenti ilə bağlı ciddi qoruyucu tədbirlər tətbiq etmişik. Azyaşlılar üçün görünən reklamların uyğunluq və təhlükəsizlik üzrə ən yüksək standartlara cavab verməsini təmin etmək üçün əlavə tədbirlər görürük.
Reklamçılara birbaşa nəzarət imkanı vermək üçün inkişaf etmiş Brend Təhlükəsizliyi həlləri təqdim etmişik, o cümlədən TikTok Inventory Filter, hanski bu alət maşın öyrənməsindən istifadə edərək brendlərə reklamlarının hansı kontentlə yanaşı göründüyünü idarə etməyə kömək edir. Bu alət yalnız TikTok-un daxili qaydaları ilə deyil, həm də qlobal standartlarla — məsələn, GARM Brand Safety Floor və Suitability Framework ilə uyğunlaşdırılıb.
Biz brend təhlükəsizliyi yanaşmamızın ən yaxşı təcrübələr və dəyişən rəqəmsal mühitə uyğun inkişaf etməsini təmin etmək üçün etibarlı üçüncü tərəf yoxlama tərəfdaşları və sənaye mütəxəssisləri ilə əməkdaşlığı davam etdiririk. İstifadəçi qorunması və brend təhlükəsizliyi mövzusunda yekun hədəf olmadığını başa düşürük. Bu davamlı bir öhdəlikdir — biz buna dərin investisiya qoymuşuq və Azərbaycanın da daxil olduğu bazalarda böyüyərkən və innovasiya edərkən prioritet olaraq saxlayacağıq.

7. TikTok-u bizneslərini inkişaf etdirmək üçün bir platforma kimi araşdırmağa başlayan şirkətlərə nəyi tövsiyə edərdiniz? Onlar nələri nəzərə almalıdır?
TikTok-da səyahətinə yeni başlayan bizneslər üçün ən vacib tövsiyə belədir: ilham alın, amma öz səsinizi tapın. Uğurlu brend hekayələrindən ideyalar götürün, lakin təcrübə etməkdən və brendinizin kimliyini, məqsədlərinə ən uyğun olan yanaşmanı kəşf etməkdən çəkinməyin. TikTok geniş çeşidli alətlər və yaradıcı formatlar təklif edir — əsas olan mesajınıza və auditoriyanıza ən təbii uyğun gələnləri istifadə etməkdir.
Platformadakı trend və populyar mövzularla ayaqlaşmaq vacibdir. Trend mövzular mövcud söhbətlərə və mədəni anlara qoşulmaq üçün güclü vasitədir — amma yalnız auditoriyanız üçün aktual olduqda. Onları öz yaradıcı yanaşmanız və brend dəyərlərinizlə birləşdirərək fərqlənin.
Daimi kommunikasiya yanaşmasını qəbul etmək də çox önəmlidir. TikTok sadəcə kontent paylaşmaq üçün bir platforma deyil — bu, dialoq üçün bir məkandır. Müntəzəm şəkildə əlaqə quran, şərhlərə cavab verən və aktiv icma quran brendlər daha yaxşı nəticə əldə edir və uzunmüddətli sadiqlik qazanır. Buradakı uğur yalnız reklam verməkdən ibarət deyil; məqsəd söhbətin bir hissəsinə çevrilmək və əyləncəli, səmimi yollarla dəyər təqdim etməkdir.
Başqa bir tövsiyə isə "sına və öyrən" yanaşmasını tətbiq etməkdir. Müxtəlif kontent növlərinin necə performans göstərdiyini müşahidə edin, formatlarla təcrübə aparın və strategiyanızı auditoriyanızla ən çox rezonans verən yanaşmaya əsaslanaraq təkmilləşdirin. TikTok dinamik və vizual bir platformadır — buna görə də kontent ilk saniyələrdən diqqət çəkici, yaradıcı və mədəni cəhətdən uyğun olmalıdır.
TikTok For Business-in necə işlədiyini daha dərindən öyrənmək istəyənlər üçün TikTok Academy — qlobal, virtual təhsil platformamız, Azərbaycanda da mövcuddur — araşdırmağı tövsiyə edirəm. Burada yaradıcı ən yaxşı təcrübələrdən tutmuş kampaniyaların optimallaşdırılmasına qədər hər şeyi əhatə edən strukturlu təlimlər təqdim olunur və bu həm yeni başlayanlar, həm də təcrübəli marketoloqlar üçün qiymətlidir.

Telegramda izləyin